Atualità
Lites provinzieles cun 14 listes, orden sun la zedules da lité
Danter 14 listes puderan ai 27 de utober crì ora pra la veles provinzieles. Chësc à (NSNUET) ai 26 de setëmber fat al savëi l’autorità zentrela dla lites do che l à messù unì stlut ora doi listes (Di Pietro Italia dei Valori y Fratelli d'Italia). Nce l orden di sënies de lista sun la zedules da lité ie unì trat ora a sort.
(NCUEI) Ai 26 de utober da mesdì ie tumeda la data per dé ite la listes di candidac per la veles provinzieles dl 27 de utober. L proscimo var ie stat chël de cuntrolé la singula listes da pert de di trëi magistrac Peter Michaeler (Suneria aministrativa), Alessandro Pallaoro (Chëurt di conc) y Werner Mussner (Suneria provinziela). Da chësc cuntrol ie unit ora che doi listes ne à nia la cundizions damandedes. La lista dla grupa "Di Pietro Italia dei Valori" ne ie nia stata bona de purté la cumpëida de sotscrizions de sustëni che ie de bujën. La lista "Fratelli d'Italia", à – aldò dl presidënt dl’autorità de vela, Peter Miacheler, purtà na autentificazion de n giudesc de pesc de Mezzolombardo che ne ie nia tl raion de cumpetënza. La listes stlutes ora possa fé recurs pra la Suneria aministrativa.
A chësta maniera iel 14 listes che ie unides azetedes per la veles de dumënia, 27 de utober. Permez ala veles dl 2008 nen iel chëst iede una de manco.
La se à nce tratà de cialé do sce i singuli candidac tën bën ite la cundizions, y tlo iel unit ora che cater candidac ne possa nia unì litei ajache l manciova i documënc che va de bujën (danterauter la detlarazion de grupa de rujeneda).
N ultima iel nce unì trat a sort l orden, aldò de chël che i sënies de lista unirà stampei sun la zedula da lité. L tré ala busca à purtà chësc orden:
Comunisti italiani
Forza Alto Adige - Lega nord
Unitalia
Alto Adige nel cuore
SVP
La destra Minniti
Rifondazione comunista
PD
Südtiroler Freiheit
Die Freiheitlichen
Verdi - SEL
Das Bündnis
Scelta civica
Movimento 5 stelle
Duta la nfurmazion sun la lites provinzieles ie da giapé tres internet al adres http://lites.provinzia.bz.it , sun facebook (landtagswahlen.2013.elezioniprovinciali) y twitter (@stwahl13; #st13).
as
