Atualità
Ai 27 d’otober gran batadù tl Museum Ladin a San Martin
En domënia ai 27 d’otober dales 13.30 gnaràl tignì tl Museum Ladin Ćiastel de Tor a San Martin de Tor le gran batadù, metü a jì en colaboraziun cun l’Uniun di stödafüch da San Martin. Les iscriziuns é bele davertes.
Tl Museum Ladin Ćiastel de Tor a San Martin de Tor gnaràl invié ia en domënia, ai 27 d'otober n domisdé d'aurela cörta. Sciöche bele da n valgügn agn incà gnaràl indô tignì le gran batadù. Dales 13.30 gnaràl formè les scuadres che metarà spo man da cartè dales 14.00.
Le gran batadù vëgn organisé dal Museum Ladin en colaboraziun cun l'Uniun di stödafüch da San Martin. Che che oress se scrì ite é perià da cherdè sö (domisdé) le numer de telefonn 339 7685970.
Ćina ai 31 d'otober saràl inće da odëi tl Museum Ladin Ćiastel de Tor la cuarta ediziun dla Trienala Ladina de ert contemporana che presentëia operes selezionades de sis artisć ladins. Le tema dl'ediziun 2013 ê "Chaos and Order" ("Caos y ordinn").
Le Museum Ladin Ćiastel de Tor a San Martin de Tor y le Museum Ladin Ursus Ladinicus a San Ćiascian resta ćiamò daverć ćina ai 31 d'otober. Do la palsa da d'invern dauriarài indô trami ai 26 de dezëmber 2013. (USP)
usp
