Atualità
Lites provinzieles: duta la nfurmazion, te trëi rujenedes, tl web
N dumënia, 27 de utober vëniel lità l Cunsëi provinziel nuef. La sëntes de vela sarà daviertes dala 6.00 ala 22.00, n pratica puderan lité da ntëur la 7.30 inant. A na maniera che duc i zitadins posse se nuzé dla modaliteies de vela, iel bel śën duta la nfurmazion sun la lites provinzieles online. Sibe la nfurmazion danora, che la plates web cun i resultac, ie unides anjeniedes te trëi rujenedes. Per l prim iede saral pra i resultac nce na sezion dedicheda ai chemuns ladins.
400.958 zitadins dla provinzia de Bulsan ie n dumënia cherdei a lité l Cunsëi provinziel nuef. Uni un possa lité na sëula lista fajan na crëusc sun un di 14 simboi sun la zedula da lité. Uni litadëur possa sëuraprò dé nchin a cater ujes de preferënza. Chësta ujes de preferënza possen me ti dé ai candidac dla lista che n à lità. L tleca scrì sun la cater risses uetes, amez ala zedula da lité l cuinuem (per na segura nce l inuem de batëisum) dl candidat o si numer sun la lista.
Lité possen te chëla sënta de vela che ie scrita sun l documënt de vela. L ie da tò pea chësc documënt de vela y n documënt de identificazion. La sëntes de vela sarà n dumënia daviertes dala 6.00 nchin la 22.00. Per ne messei nia aspité, cunsieia l’autorità de vela de jì permò do mesa la ot da duman a lité, ajache dant muessel mo unì fat na lingia de preparazions. L muessa per ejëmpl unì timbrà uni singula zedula da lité.
Chi che uel nfurmazion plu avisa sun la modaliteies de vela danora, les giata tres internet, sun la plata web lites.provinzia.bz.it. Iló iel prejentà duta la nfurmazion n cont dla lites, i sënies de lista, i inuemes di 424 candidac y nce n video cun n ressumé dla nfurmazions prinzipeles. Pra la plates web di resultac saral pona na nuvità. Per l prim iede iel unì dedicà na sezion che mostra su i resultac y la cumpëides de tanc che ie jic a lité ti ot chemuns ladins deberieda.
Nuviteies n curt sun la lite provinzieles vën sëuraprò nce dates inant sun facebook (landtagswahlen.2013.elezioniprovinciali) y twitter (@stwahl13; #st13).
as
