Atualità
Dumënia vëniel lità l Cunsëi provinziel, lunesc zënter de media tl palaz Widmann
L cunsëi provinziel nuef vën lità n dumënia 27 de utober. La sëntes de vela gëura dala 6.00 y l puderà unì lità nchin dala 22.00. Lunesc da duman uniral scumencià a cumpedé ora la ujes y la cumpëides puderan udëi do y do tres internet. Dut l partimënt basite dl palaz Widmann a Bulsan sarà dedica al zënter media.
Dumënia 27 de utober iel nfati di de vela te duta la provinzia de Bulsan. Scebën che la sëntes de vela gëura bele dala 6.00 da duman, puderan permò jì a lité canche i documënc ie anjeniei. Davia la che muessa danterauter unì timbra duta la zedules da lité, iel da fé cont che la jënt possa scumencé a lite dala 7.30 inant. L possa unì lità na sëula lista y de chësta possen crì ora nchin a cater candidac.
N prim cheder dla situazion de vela, tanc che di 400.958 litadëures ie jic a lité, puderan bele savëi ntan la dumënia. Chisc dac vën cumpedei dala 11.00, dala 17.00 y do avëi sarà la sëntes de vela, dala 22.00. La cumpëides, de ndut y chemun per chemun, puderan udëi sun la plata web lites.provinzia.bz.it. Per l prim iede iel nce unì anjenià na sezion che mostra su la soma di chemuns ladins.
Sun la medema plata web puderan nce udëi co che ruva ite, man man, i resultac dla 488 sëntes de vela. Sce dut va sciche prugramà, puderan lunesc danmesdì bele nrescì i resultac de lista y pona tl prim domesdì la cumpëides dla ujes de preferënza. Nuviteies n curt vën sëuraprò nce dates inant sun facebook (landtagswahlen.2013.elezioniprovinciali) y twitter (@stwahl13; #st13).
I media puderà n lunesc ti sté do al cumpedé ora dla ujes tl zënter dla uperazions, l palaz Widmann a Bulsan. Tl partimënt bas ite anjënia l Servisc de comunicazion dla Jonta provinziela n zënter media, da chël che radio y televijions repurterà i resultac dla lites dal vif. (USP)
as
