Atualità
Ruvei a una tl stritoz dl storm tla Venuesta: “n bon cumpromis”
Duta la pertes nteressedes al stritoz dl strom tla Venuesta à (NCUEI) ai 25 de utober laudà l ruvé a una sciche n bon cumpromis. I scioldi per l ambiënt ie bele unic nviei via ai trëi chemuns nteressei Laas, Martell y Latsch. A n’acurdanza de mascima iesen nce ruvei n cont dla cunzescion y l mené dla zëntrela Laas/Martell y dl sëurantò dla rë dal strom.
"Cun chësta acurdanza de mascima fina via ani de tratatives, y chësc me ajache duta la pertes à mustrà bona ulentà y ie jic ancontra" à sorissà l presidënt dla Provinzia Luis Durnwalder te si ufize, ulache i reprejentanc di chemuns dla Venuesta, l cunsorz patron dla Venuesta (VEK) y la sozietà provinzela SEL fova unic nviei per n'ancunteda contlusiva. Na tel minonga à nce l presidënt dl VEK Albrecht Plangger: "Son cuntënc dl resultat dla tratatives y speron che a chësta maniera pudons nce giaurì n capitul nuef dla culaburazion" à dit Plangger.
L'acurdanza fina via l stritoz per la sëurandata dla cunzescion dal'ega per la zëntrela Laas/Martell ala Hydros, te chëla che duc trëi chemuns nteressei vën trai ite y giapa n iede 1,8 milion de euro di scioldi per l ambiënt. Chësc segondo pont à dat pro l Presidënt dla Provinzia, deberieda cun si vize y l assessëur per l'energia. "De ndut iel 900.000 euro al ann a desposizion di chemuns, y chësc per 30 ani" à dit Durnwalder. Te chësc mumënt iesen tardives de trëi ani, perchël uniral prësc paià ora 1,8 milion de euro ai uni un di trëi chemuns.
L'acurdanza reverda nce na dezijion de mascima danter la Venuesta y la SEL. La se trata de na partezipazion ala zëntrela y la cundizion che la rë de spartizion dl strom vënie sëurantëuta dai chemuns dla Venuesta.
"L'acurdanza da ncuei ie n var mpurtant, nia me per la Venuesta, i trëi chemuns spezifics, al Provinzia y la SEL, ma nce per l ji inant dla tratatives ti autri caji", nscì Durnwalder fajan dantaprima referimënt ala tratatives cun i Etschwerke. "L ne sarà dessegur nia saurì, ma senton sun na fin dl stritoz cun i Etschwerke y dantaprima de ruvé a na soluzion tl cuntest de na majera culaburazion danter i produtëures plubics de energia tl Sudtirol", à dit l Presidënt dla Provinzia. (USP)
as
