Atualità
77,7 ie jic a lité l Cunsëi provinzel nuef: 2,4 de manco permez a dan cin ani
77,7 percënt di zitadins cherdei ala veles, 289.766 persones, à ncuei dat ju si stima per l Cunsëi provinziel nuef de Buslan. Paredlan chësta perzentuela al’ultimo iede, dan cin ani, ie chësc n manco 2,4 ponc de percënt. Ti chemuns ladins à lità l 79,3 percënt, che ie 3,5 ponc de manco che dan cin ani.
La cumpëida de tanc che ie (NCUEI) ai 27 de utober jic a lité ie tla tendënza negativa di ultimi ani. Dan 15 ani, l ann 1998 fovel stat 85,7 pecënt di litadëures che ova dat ju si stima, l iede do, dl 2003 nen n fovel "me" plu 82,4 percënt y dl 2008 nchinamei 80,1 percënt. Chëst ann ie 77,7 percënt di litadëures jic a lité y nscí ie la partezipazion per l prim iede caleda sot a l livel di 80.
Ti chemuns ladins ie i litadëures stai plu lezitënc permez ala media provinziela. Cumpedan adum ala sezions de Gherdëina y Badia ie 79,3 percënt di litadëures jic a lité. Chësta perzentuela ie de 3,5 ponc de percënt plu bassa permez a dan cin ani canche ti ot chemus ladins ova lità l 82,8 percënt.
I litadëures da La Val ie stai i plu lezitënc di ot chemus ladins, cun na partezipazion de 87,3 percënt. Nsci fovela nce stata dan cin ani. I manco lezitënc dla Ladina ie chëst iede stai i litadëures de Corvara cun na perzentuela de 74,9 percënt. La majera defrënzia de partezipazion dal 2008 al 2013 ie stat te Sëlva, ulache la ie caleda de 7,2 ponc de percënt ruvan ju al 75,5 percënt.
Di majeri chemuns dl Sudtirol iel unì arjont chësta perzentueles de litadëures jic a lité: 64,6 a Bulsan (2008: 73,2 percënt), 65,6 a Maran (69,1 percënt), 76,7 a Persenon (77,5 percënt), 79,1 a Burnech (80,2 percënt) y 65,4 a Leifers (72,5 percënt).
La cumpëides de tanc che ie jic a lité, chemun per chemun, possen udëi tla Rë zivica de Sudtirol, sun la plata lites.provinzia.bz.it. Per l prim iede iel nce unì anjenià na sezion che mostra su la soma di chemuns ladins.
Sun la medema plata web puderan n lunesc udëi co che ruva ite, man man, i resultac dla 488 sëntes de vela.
Nuviteies sëuraprò vën nce fates al savëi tres facebook (landtagswahlen.2013.elezioniprovinciali) y twitter https://twitter.com/stwahl13; #st13).
Perzentuela de jic a lité
2013 | 2008 | +/- | |
La Val | 87,3 | 89,3 | -2 |
S.Martin | 83,4 | 85,4 | -2 |
S.Crestina | 80,1 | 83,4 | -3,3 |
Mareo | 79,9 | 83,0 | -3,1 |
Badia | 79,2 | 82,2 | -3 |
Urtijëi | 78,4 | 81,3 | -2,9 |
Sëlva | 75,5 | 82,7 | -7,2 |
Corvara | 74,9 | 79,6 | -4,7 |
CHEMUNS LADINS* | 79,3 | 82,8 | - 3,5 |
* l mancia la frazions ladines de Ciastel
as
