Atualità
Resultac provisories dla lites provinzieles y mandac tl Cunsëi provinziel de Bulsan
La lites provinzieles 2013 ie finedes via y da mesa la cater domesdì ie nce i resultac provisories dan man cun la spartizion di mandac. Aldò de chisc saral ntan la proscima legislatura nuef partic tl Cunsëi provinziel, la majera frazion ie inò la SVP cun 17 cumëmbri.
Dala 7 da duman iel unì scumencià a cumpedé ora la zedules de lita y la ujes de preferënza y bele dala 15.30 fova duta la 297.153 ujes cumpededes ora (danter chëstes nce chëles che ie ruvedes da oradecà tres posta). La 286.961 stimes che vel, cumpëida per la 14 listes de candidac.
La majera cumpëida à giapà la SVP cun 45,7 percënt, dan i Freiheitlichen (17,9 percënt), i Vërc (8,7 percënt), la Süd-Tiroler Freiheit (7,2 percënt), l Partito Democratico (6,7 percënt), Forza Alto Adige (2,5 percënt), Movimento 5 Stelle (2,5 percënt), l Bündnis BürgerUnion - Ladins Dolomites - Wir Südtiroler (2,1 percënt), L'Alto Adige nel cuore (2,1 percënt), Unitalia Movimento per l'Alto Adige (1,7 percënt), Scelta Civica (1,6 percënt), La Destra Minniti (0,6 percënt), Rifondazione Comunista (0,4 percënt) y Südtiroler Komunisten (0,3 percënt).
Nce sce mo nia ufiziel de fin, iel bel dan man la spartizion di mandac te Cunsëi provinziel de Bulsan. Ntan i proscimi cin ani saral tlo l SVP cun 17 mandac (un n mandat de rest), Die Freiheitlichen cun sies mandac, i Vërc cun trëi, la Süd-Tiroler Freiheit ënghe cun trëi (un n mandat de rest), la Partito Democratico cun doi y pona mo cun daniëura n mandat de rest, Forza Alto Adige, Bündnis BürgerUnion - Ladins Dolomites - Wir Südtiroler, L'Alto Adige nel cuore y Movimento 5 Stelle.
Duc i dac plu tl detail possen cialé do sun la plates web http://lites.provinzia.bz.it. (USP)
as
