Atualità
Sorvisc meteo dla Provinzia pro la gara de copa dl monn te Gherdëna
OSP - Por aconsié le miù poscibl i organisadus dla gara de copa dl monn te Gherdëna sön ci che le tëmp fej él en vëndres y en sabeda n meteorologh dla provinzia sön le post. Implü vëgnel vigni dé fora dal Sorvisc meteo dla Provinzia na previjiun dl tëmp speziala aposta por chësta manifestaziun che s’anüza ince di dac dla staziun meteo te Sëlva.
„Por la gara de copa dl monn te Gherdëna él chëst ann gnü damanè do le sostëgn dl Sorvisc meteo dla Provinzia por aconsié i organisadus dla manifestaziun por ći che reverda le tëmp" dij Hanspeter Staffler, diretur dla repartiziun provinziala Proteziun zivila. Bele da n valgügn dis incà vëgnel fora incër misdé previjiuns dl tëmp speziales cun de vigni sort de informaziuns sciöche le poscibilité de prezipitaziuns, le limit dla nëi, le vënt, les temperatöres mascimes y minimes pro le start y le travert. Dać importanć vëgn sambëgn dala staziun meteo te Sëlva cun informaziuns sön la temperatöra, l'umidité y la presciun dl'aria.
Le meteorologh dla Provinzia Werner Verant é en vëndres y en sabeda sön le post por podëi valuté damì la situaziun „Sön le post ti poi pormez a düć i dać y modì de previjiun dl Sorvisc meteo y insciö aconsié te na manira otimala i organisadus" à alzè fora le meteorologh Verant. Do da edemes de bel tëmp podéssel propi gnì nëi frësca tratan i dis dla gara. "Por le vëndres s'aspéton n valgügn zentimetri de nëi frësca, en sabeda indere arunse da fà i cunć cun le ćiarü che podess limité la visibilité" à dit Verant.
Pro de gran manifestaziuns él n'inćiaria dl Sorvisc meteo provinzial da portè pro a plü segurëza cun previjuns dl tëmp speziales che i organisadus sa da anuzé cun reconescënza.OSP
