Atualità
L´assessur Mussner sostëgn le proiet Lingaz Ladin - Bëgn imaterial Unesco: “Scomenciadia por le dagnì de nosc lingaz”
USP - Incö, lönesc ai 5 de mà dl 2014, él gnü presentè ofizialmënter a Cortina d`Ampëz le proiet "Lingaz Ladin - Bëgn imaterial Unesco", che à sciöche fin chël da inserì le lingaz ladin tla lista di bëgns culturai imaterials dl`Unesco.
La scomenciadia presentada incö tl salf de comun de Cortina, olache ciafun inće la sënta ofiziala pro tempore dla fondaziun "Dolomites - UNESCO", mira ala reconoscënza dl lingaz ladin sciöche bëgn imaterial dl`Unesco. Porchël él inće gnü costituì ofizialmënter le comitê "Lingaz Ladin - Unesco" cun la inćiaria de arjunje chësc obietif. Le comitê é formè da 13 rapresentanc dl monn dla politica y dla cultura ladina.
L`ideadëssa dl proiet é Marina Crazzolara, la surastanta dla Uniun di Ostis dla Val Badia a livel provinzial, che dij: "La reconoscënza dl lingaz ladin sciöche bëgn imaterial dl`Unesco podess portè a na revalutaziun dl lingaz y dla identitè ladina, na cossa importanta inće por le mategnimënt dl ladin tl tëmp sciöche lingaz dla uma". Por l`assessur ladin Florian Mussner, che fej inće pert dl comitê, podess chësta scomenciadia portè sü früć tl dagnì: "La reconoscënza dles Dolomites sciöche patrimone natural dl Unesco à portè a na maiù cosciënza de nosta tera y de nosc patrimone natural, insciö portass la reconoscënza dla rujeneda ladina y de sües formes dialetales zigü inće a na maiù conoscënza de nüsc idioms sciöche patrimonè sozial, cultural, linguistich y inće personal". Implü daidass inće chësc reconoscimënt da renforzè l`azetanza por adorè y vire nüsc idioms, inće deache al é dër important che nos viun y adorun nüsc idioms tla vita da vigni dé, dij Mussner.
Le proscimo vare por le comitê é la costituziun scrita de n proiet da prejentè ala Comisciun Nazionala dl Unesco a Roma. Do che la comisciun à dè jö sües conscideraziuns, podess le proiet gnì portè dant ala sënta prinzipala dl`Unesco a Parigi tla Francia.
Al fej pert dl comitê danter l´ater inće rapresentanc dla Provinzia de Balsan: l`assessur ladin Florian Mussner, l`intendënt dles scores ladines Roland Verra, Cecilia Miribung (referënta dl prësident Kompatscher), siöche inće l´professur dla Université da Balsan Paul Videsott y l´presidënt dl´Istitut Ladin "Micurà de Rü" Leander Moroder.
rc
