Atualità
Prejentazion dl liber "blizost - vicinanza - daujín - in der nähe" de Lilia Ianeva n vënerdì ai 9 de mei a Bulsan
N vënerdì, ai 9 de mei 2014, dala 17.00, uniral presentà tla sënta dla Biblioteca provinziela taliana "Claudia Augusta" tla streda Mendola 5 a Bulsan l liber "blizost - vicinanza - daujín - in der nähe" de Lilia Ianeva. La ntreda ie liedia.
L liber de poejies "blizost - vicinanza - daujín - in der nähe" ie unit scrit da Lilia Ianeva tl stil "haiku", tla rujenedes bulgara, taliana, tudëscia y ladina. Cun "haiku" ntënden na cumposizion poetica che vën dal Iapann y che ie n generel metuda adum da trëi versc (5-7-5) y de ndut dejeset silbes. Chësta sort leterera vën dantaldut adurveda per descrì la natura y i sentimënc dla persones; ti haiku fërma l poet n stat dl'ana tres imajes dla natura che ie ntëur ël. L liber ie abelì cun ilustrazions dl artist de Gherdëina Vinzenz Senoner.
La publicazion unirà presenteda cun la presënza dl'autora Lilia Ianeva y de Valeria Trevisan, diretëura dla Biblioteca Provinziela Taliana "Claudia Augusta", che nvierà via la sëira.
Apuntamënt n vënerdì, 9 de mei 2014, dala 17.00, tla Biblioteca provinziela taliana "Claudia Augusta", tla streda Mendola 5 a Bulsan.
L'atëura Carmen Esposito y Aaron Moroder liejerà n valgun haiku de Lilia Ianeva; l acumpaniamënt de mujiga unirà fat dal pianist Roberto Satta y dai sculeies dla Scola Mesana "V.Alfieri" y dl Lizeum "G.Pascoli" de Bulsan, dla Scola de Mujiga de Gherdëina y dla Scola d'Ert "Cademia" de Urtijëi, che sunerà nce pec de musizisć dla Bulgaria.
N chësta ucajion uniral metù ora tla biblioteca l lëur de Vinzenz Senoner repurteda sun la cuvierta dl liber.
USP
