Atualità
Sentada dla fondaziun Unesco incö a Cortina
USP - Incö, mercuì ai 7 de mà, à le consëi d´aministraziun dla fondaziun "Dolomites Unesco" aprovè le program anual por le 2014 -"Sëgn podun se dediché a i laûrs che s´aspeta", dij Richard Theiner, assessur provinzial y presidënt dla fondaziun.
La fondaziun "Dolomites UNESCO" aministrëia la reconoscënza dles Dolomites sciöche patrimonè mondial natural dl´Unesco. La sentada da incö a Cortina tla sënta pro tempore dla fondaziun Unesco â sön l´ordinn dl dé l´aprovaziun dl bilanz final 2013 y le program anual 2014.
"Le program é ćiamò gnü n iade ejaminè a funz, por podëi insciö partì sö i mesi finanziars metüs a desposiziun dales provinzies te na manira otimala. Le program por le 2014 é gnü aprovè y insciö podun sëgn se dediché ai laûrs che s´aspeta", à dit le prësident dla fondaziun "Dolomites Unesco" Richard Theiner do la sentada.
Ala sentada à tut pert inće la secreteria generala dla fondaziun "Dolomites Unesco" Marcella Morandini, che â fat na proposta de modaziun al statut dla fondaziun, modaziun gnüda aprovada. La modaziun é stada nezesciara söla basa dl´aboliziun che à da gnì dles provinzies tla Talia y che prevëiga ma plü un en consëi d´aministraziun por dötes les provinzies y regiuns interessades (impede i dui organns atuai, la "junta diretiva" y "le consëi d`aministraziun").
La fondaziun "Dolomites Unesco" é gnüda costituida tl'ann 2010 dales ot juntes dles cinch provinzies y trëi regiuns y s´ocupëia dla reconoscënza dles Dolomites sciöche bëgn natural mondial da conservè y mantignì tl tëmp. La fondaziun promöia la colaboraziun danter les regiuns y les provinzies. I assessurs de competënza dles desvalies provinzies fej pert dl´consëi de aministraziun dla fondaziun.
La presidënza dla fondaziun "Dolomites Unesco" müda vigni trëi agn danter les provinzies. Por le momënt él Südtirol che à la presidënza cun l´assessur por l´ambiënt Richard Theiner, les atres provinzies é: la provinzia de Trënt, la provinzia de Belun, la provinzia de Pordenone y la provinzia de Udin. Inplü fejel pert dla fondaziun les trëi regiuns dl Trentino - Südtirol, dl Venet y dl Friul.
rc
