Atualità
Convenziun Provinzia-RFI: 33.000 metri cuadrać passa ala Provinzia
USP - Miorè les infrastrotöres dla mobilitè dla Provinzia y aumentè les arees da anuzè por le trafich sön les scines: le presidënt dla Junta Provinziala Arno Kompatscher s´à acordè incö cun l´aziënda statala inćiariada da aministré la rëi dles scines, la RFI. Ala Provinzia passèl indöt 3,3 hectar de arees da aministré, partides sö te ot comuns provinziai.
"Incö sunsi te na situaziun dër plajora, i po racöie i früć che é gnüs somenà dala aministraziun da denant", dij Arno Kompatscher, presidënt dla Junta dla Provinzia, do la firma söla convenziun tra la Provinzia de Balsan y la RFI (aziënda inćiariada da aministré la rëi dles scines statala). Bele tl ann 2008 â la Junta Provinziala da denant concordè cun la RFI da investì 39,5 miliuns de euro por miorè les infrastrotöres dla mobilitè. „Chisc scioldi é gnüs investis ti ultimi agn tla modernisaziun de staziuns y tla rëi dles scines", spliga Kompatscher.
Decuntra él sté l´aziënda RFI che à oblié da dè inant ala provinzia arees dlunja les staziuns che ne vëgn nia plü anuzades. Insciö él passè ala provinzia indöt 3,3 hectar de arees, partides sö te chisc ot comuns: Balsan, Porsenù, Waidbruck, Sterzing/Pfitsch, Sanciana/Innichen, Burgstall, Olang y San Laurënz/St. Lorenzen.
„Cun les arees che un ćiafè incö ćiarun da miorè la situazion dl trafich local, sciöche sorvisc a düć i zitadins che anüza le trasport publich", dij Kompatscher. Preodü él la realisaziun de plazes da parchè por pendolars, sciöche inće architades o infrastrotöres publiches por la mobilité. Tl dagnì saral inće ćiamò na terza surandada de arees da pert dla RFI, „les tratatives por l´ultimo trasferimënt é ćiamò da fà fora cun la RFI, aspetun denant che i laûrs de mioramënt dles infrastrotöres é rovà", à detlarè incö Kompatscher.
rc
