Atualità
Stocker vijitëia l´Istitut por l´assistënza ai viadus y ai pici ćina trëi agn
USP – Por viadus, piceres y pici ćina trëi agn che vëgn da situaziuns familiares complicades, y por umes cun pici mituns te situaziuns de emergënza él l´Istitut por l´assistënza ai viadus y ai pici a Balsan en punt de referimënt. L´ann passè él stè indöt 17 mitans y mituns che à abité tl´Istitut provinzial che an po ćiafè en via Guncina 54 a Balsan.
„I mituns é la pert plü debla de nosta sozieté y adora porchël inće na proteziun speziala", à dit l´assessuria por les politiches soziales Martha Stocker, inier, ai 7 de mà, tratan na vijita ala strotöra.
Liana Zancanella, direturia dl`Istitut, à splighé ala assessuria Martha Stocker tratan la vijita l´concet pedagogich dl´Istitut: „Nia ma personal dër cualifiché y na assistënza profescionala y ampla, mo inće patüc da fá belëita, pitöres, chedri, mebli por mituns y tröp d´ater dess ti dè ai mituns y ales mitans la sensaziun da ester a ćiasa y da vire adöm a na familia."
„L´sorvisc sozial o l tribunal di jogn nes mëna i mituns o les mames y nos ćiarun da acontentè i bojëgns che vëi à", spliga Zancanella. Ales mames ti vëgnel dè consëis por ći che reverda la cura di pici y por problems desvalis che po nasce pro le guern di viadus.
L´assessuria à laldè tratan süa vijita inće la buna colaboraziun danter l´Istitut y atri sorvisc desvalis sciöche l´tribunal di jogn y l´sorvisc sozial. Öna dles chestiuns che é gnüdes tratades ê inće la situaziun atuala dla strotöra, che é gnüda costruida ti agn 70 y che messass gnì adatada ai tëmps moderns. L´assessuria à assiguré da portè inant chësta chestiun.
rc
