Atualità
Theiner sön les tofles de retlam: “Evité dagns ala contrada“
USP - Te en gröm de comuns tl Südtirol él gnü fat tl ultimo tëmp en gröm de domandes da pert de n aziënda dl Piemont da mët sö tofles de retlam. L´assessur provinzial Richard Theiner confermëia che les tofles de retlam de chëres proporziuns n´é do l´articul 25 dla lege sön la sconanza dla contrada de regola nia conzedüdes.
"Les diretives dla provinzia por ći che reverda la sconanza dla contrada é dër tleres. Chëstes dà dant ales aministraziuns comunales ciünes tofles che é conzedüdes y ciünes che ne l´é nia", dij l´assessur Theiner y stalrësc insciö le cheder legislatif por ći che reverda les domandes por l´instalaziun de tofles de retlam gnüdes fates te n gröm de comuns.
Denfora dles localitês él de regola proibì da instalè tofles de retlam, tl zënter dles localitês él le comun che à la competënza da elaborè n regolamënt basè sön l´ordinamënt por le frabiché comunal y les prescriziuns dl codesc dla strada. "I comuns é perià da respetè la normativa inće tles zones abitades. L´obietif é chël dè evité n dann al cheder dla contrada cun n müdl de tofles de retlam sciöche àl capitëia bele te atres regiuns", dij Theiner.
rc
