Atualità
Acordanza comerziala trans-atlantica: impëgn por la sconanza di consumadus
Informaziuns sön la situaziun contratuala, garanzies por la sconanza di consumadus, dla contrada y dla produziun: chëstes è les tematiches prinzipales dla tuta de posiziun sön la TTIP, l’acordanza comerziala che atualmënter vëgn contratada dala Uniun Europeica cun i Stać Unis d'America, y che le Presidënt dla Junta Provinziala Arno Kompatscher portarà dant al Consëi provinzial de Balsan.
Tratan la pröma sentada dla Consulta nöia por la sconanza di consumades adöm al Presidënt Arno Kompatscher él gnü tratè les modalitês por na tuta de posiziun coletiva por ći che reverda l'acordanza comerziala transatlantica por investimënć y por le trafich de bëgns (TTIP): l'acordanza stabilëia insciö l'aboliziun de restriziuns comerziales te n gröm de seturs economichs por favorisé la cumpra y la venüda de bëgns danter l'Europa y i Stać Unis d'America.
Insciö à le Presidënt Kompatscher y la Consulta nöia por la sconanza di consumadus laorè fora na tuta de posiziun, inće por ći che reverda i mudamënć dla sconanza di consumadus, che gnarà portada dant al Consëi provinzial por avëi l'autorisaziun da intervenì sön les tratatives inće a livel statal y europeich.
Le documënt che gnarà presentè prevëiga la garanzia de avëi dötes les informaziuns nezesciares y i tesć dles tratatives trans-atlantiches y che al vëgnes assigurè dal acordanza düć i standards europeichs por ći che reverda la sconanza di consumadus, i dërć di lauranć, la sconanza dl'ambiënt, la segurëza di standards de produziun, y zënza smendrì la cualité.rc
