Atualità
Streda statela de Gherdëina mo for śareda tal Falnoder/Laion
USP – La streda statela de Gherdëina danter Pruca (pra l Falnoder tl chemun de Laion) y Prembach resta śareda nchin ai 13 de juni. Ntan i lëures de restruturazion dla streda cun chëi che n à metù man dan puech, iel unit ju na smueia y pervia de chël se trajerà i lëures mo ora per n valguna enes.
Pra i lëures sun la trata de n mez chilometer sun la streda statela de Gherdëina pra l Falnoder a Solaion danter Pruca y Prembach vala de restruturé na luegia periculëusa. "Nchin śën fova chësta pert dla streda mpue plu lergia y l se strënjer te n iede dla streda tla direzion Urtijëi fova na gauja de pericul" tlarësc l diretëur dla Repartizion provinziela Nfrastrutures Gustavo Mischi.
Ai 5 de mei àn metù man cun i lëures. Sun na lunghëza de 170 metri dëssel oradechël unì fat su n mur de peton armà per la streda de sies metri. Pra i lëures de giavamënt che ie de bujën se àl purtà pro na smueia pervia de influenzes geologiches che ne fova nia da udëi danora. Chësc vën repurtà tla relazion dla geologa Maria Luise Gögl. Acioche la firma de costruzion nciarieda posse jì inant cun i lëures muessa la streda bonamënter resté śareda nchin ai 13 de juni dij Gabriella Zanetti dl Ufize tecnich provinziel Stredes zënter-sud. Śaré la streda ie de bujën per bujëns de segurëza sotrissea l coordinadëur per la segurëza Giovanni Benussi. I lëures jirà inant nce do i 13 de juni, ma iló puderà la streda te uni cajo unì giaurida per l trafich cun na cursia sëula.
USP
