Atualità
Kompatscher y Tommasini: Te trëi agn na porjun nöia a Balsan
USP – „Bele da d’altonn oressun podëi comuniché chi che à davagné le concurs scrit fora por fà sö danü la porjun da Balsan, inće por avëi insciö na porjun nöia a Balsan te dui ćina trëi agn”: Chîsc i tëmps che le Presidënt dla Junta provinziala Arno Kompatscher y che sò sostitut ofizial Christian Tommasini oress tignì ite por realisé la costruziun nöia, sciöche trami dui à inće confermè incö tratan na vijita ala porjun atuala. „La strotöra nöia gnarà fata sö aladô de standards moderns“, impormët Kompatscher.
Adöm ala direturia dla porjun Maria Rita Nuzzaci y al comandat dla polizia por les porjiuns, Angelo Fratacci, à Kompatscher y Tommasini vijité incö les zeles dla porjun, i ofizi y le salf di pasć por podëi valuté personalmënter les condiziuns dla strotöra che atualmënter é massa plëna. Kompatscher à insciö impormetü tratan la vijita de miorè les condiziuns dla strotöra: „Bele chësta edema gnaral daurì les propostes dles dites che à tut pert al concurs, ćina da d'altonn orunse comuniché chi che à davagné y spo adorunse danter dui ćina trëi agn por podëi rové i laûrs", spliga Arno Kompatscher.
Kompatscher sotlignëia inće l'importanza dla costruziun nöia sciöche investimënt por la segurëza y l'integraziun soziala: „Nos orun che la porjun vëgnes fata sö aladô de standards moderns y che ara sides n ejëmpl inće t'Europa", dij Kompatscher, che à inće ciafè le sostëgn dla direturia Nuzzacci: „La strotöra nöia é nia ma n mioramënt dles condiziuns de vita dles porsones sarades ia, mo ara é inće d'aiüt por l'integraziun soziala do le tëmp passè te porjun", insciö Nuzzacci.
La re-integraziun soziala dles porsones sarades ia é inće na chestiun fondamentala por Christian Tommasini, che dij: "Chi che é te porjun chilò a Balsan dess insciö avëi la poscibilité da ciafè na formaziun suplementara o da arjunje le ejam de bilinguism tratan le tëmp che ai mëss stè te porjun, por s'arjigné ca ala vita do la porjun".
rc
