Atualità
Dezijiuns dla sentada dla Junta da incö: Zirconvalaziun a Balsan, 19 farmazies nöies, Safety Park
USP - Les dezijiuns plü importantes tratades dala Junta provinziala incö a Balsan é stades l’aprovaziun dla daurida de 19 farmazies nöies tl raiun provinzial, la revijiun dles ativitês organizades tl Safety Park y le proiet de na zirconvalaziun a Balsan.
Indöt gnaràl laprò proscimamënter 19 farmazies nöies te döt le raiun provinzial: la Junta provinziala à aprovè incö le concurs por la daurida de 19 farmazies nöies. „Do consultaziuns cun i ofizi y i comuns interessà, à la Junta provinziala tut la dezijiun da scrì fora n concurs por la daurida de 19 farmazies nöies tla provinzia. Ara à insciö atuè na diretiva statala che à mudé i criters por la daurida de farmazies y arbassè le numer de zitadins che va debojëgn por na daurida", spliga le Presidënt dla Junta, Arno Kompatscher, tratan la conferënza stampa do la sentada. Al gnarà laprò 6 farmazies nöies a Balsan, döes a Porsenù y Maran, öna na farmazia gnaràl daurì te chisc comuns: Ahrntal, Bornech, Eppan, Kaltern, Lana, Leifers, Ritten, Sarntal y Schlanders.
Implü à la Junta provinziala baié incö dl proiet de na strada de zirconvalaziun a Balsan, aprovan les carateristiches tecniches dl proiet. "Cun l'aprovaziun dles carateristiches tecniches unse fat le proscimo vare por la realisaziun dl proiet che é partì sö indöt te cater perts desvalies y che costarà zirca 368 miliuns de euro", spliga l'assessur por i laûrs publics Christian Tommassini. I proscimi vari sarà sëgn l'inserimënt dl proiet tl plann d'atuaziun por la costruziun dles strades y ciafè i mesi finanziars por la realisaziun, dij Tommasini, che ne prevëiga instës nia che i laûrs pois bele mët man le proscimo ann.
Na terza dezijiun dla Junta provinziala à ravardè incö l'aprovaziun por elaborè na revijiun dl plann dles ativitês organisades tl Safety Park a Pfatten (Leifers), olache al vëgn metü a jì cursc por la segurëza d'arvëne sön strada y inće manifestaziuns y gares cun i motocross y i gokarts. „Deache de plü porsones che vir tles vijinanzes dl Safety Park s'à lamentè dl desturb acustich dles manifestaziuns organisades y che chëstes ne fej nia pert di cursc de segurëza sön strada, che é l'ativité prinzipala dl Safety Park, orunse studié sce al é poscibl da smendrì le numer dles gares y manifestaziuns cun i motocross y i gokarts zënza avëi n dann finanziar massa alt por la Provinzia", spliga Kompatscher, che dij: „La revijiun à trëi obietifs: porvè da smendrì le desturb acustich por la popolaziun, assiguré la cuantité y cualité di cursc por la segurëza d'arvëne che va debojëgn por dites y privać y fà paié le contribuënt le manco poscibl". La revijiun dl plann dles ativitês gnarà elaborada dal consëi d'aministraziun dl Safety Park.
rc
