Atualità
Ferates FLIRT da sëgn inće tla Provinzia de Trënt
USP - Por l’assessur por la mobilité Florian Mussner é la metüda en funziun te chisc dis dles ferates FLIRT inće tla Provinzia de Trënt “n sëgn dla buna colaboraziun y n vare inant por modernisé le trasport publich local“. Le model dles ferates é le medemo che vëgn bele adorè tl Südtirol.
Les ferates che é piades ia da püch tla Provinzia de Trënt é dla medema sort co les 16 ferates FLIRT che é bele en funziun tla Val de Puster y tles atres perts dl Südtirol. L'unica desfarënzia é sciöche ares ćiara fora, impede le corù grisc y le tët da de plü corusc dles ferates locales él gnü adorè por les ferates n funziun tl Trentin i corusc blanch y cöce. „La coordinaziun y la metüda n funziun dles medemes ferates te döta la regiun desmostra che i sun sön le tru da modernisé le trasport publich te döt le raiun regional", dij l'assessur Mussner.
Inće por Roberto Andreatta, diretur dl trasport publich local dla provinzia de Trënt, é l'aspet unitar te döt le raiun regional important: „Avëi le medemo material sön les scines n'é nia ma n vantaje por i passajiers, mo al dëida inće da coordiné l'organisaziun dl trasport sön les scines y porta pro a na politica unitara dla mobilité." La cumpra dles ferates y inće la preparaziun tecnica é gnüdes realisades tres la cooperaziun dles döes provinzies. Les ferates nöies tl Trentin é ćiamò n proa, mo viagëia inće bele tla provinzia de Balsan, le start ofizial sarà spo ai 15 de jügn.
rc
