Atualità
Turism, la Provinzia deura indô l'azès al fonds de rotaziun
USP - Vare nü tl prozès de reforma dla politica de sostëgn dl'economia. La junta provinziala à tut la dezijiun da daurì danü l'azès al fonds de rotaziun por le setur dl turism. "Por mirit dles regoles nöies - sotrissëia le presidënt dla Provinzia Kompatscher – sarà le fonds plü efiziënt, flessibl y finanziariamënter sostenibl por n tëmp lunch".
La revijiun dla politica de sostëgn dl'economia portada inant dala Provinzia, cun n adatamënt ai bojëgns nüs dl monn imprenditorial y ala situaziun de bilanz desvalia, rapresentëia öna dles prioritês dl esecutif de Arno Kompatscher. Bele de merz él gnü metü a jì n percurs che va fora dla logica di contribuć direć por ti jì adincuntra a chëra di imprësć cun fic alisirà. "Chësc conzed - sotrissëia le presidënt dla Provinzia - na "lauraziun" plü asvelta dles domandes, fat che fej a na moda che le stromënt de sostëgn sides plü efiziënt. Por mirit dla strotöra dl fonds de rotaziun ne pëson gnanca demassa sön i cunć publics".
N vare important te chësta direziun él gnü fat en mertesc (ai 10 de jügn) dala junta provinziala, che à tut la dezijiun da daurì danü le fonds de rotaziun por le setur dl turism. "Por mirit dl stop di contribuć - dij Arno Kompatscher - sunse stà bugn da recuperè i aretrać che s'â acumulé ti ultimi agn, y por ći che reverda le fonds de rotaziun êl debojëgn da antergnì a n'atra moda. I l'ùn fat adatan i criters y les diretives de chësc stromënt de sostëgn important".
Cun la deliberaziun aprovada en mertesc vëgnel ejaminé l'investimënt mascim amissibl te trëi agn, che podarà arjunje 2 miliuns de euro por les pices impreses y 3 miliuns por les aziëndes mesanes y les gran impreses. Novitês él inće por ći che reverda la cuota de partezipaziun a ćiaria dla Provinzia pro i imprësć dauris tres le fonds de rotaziun: ti pröms 10 agn ne podaràn nia superè le 60%, por spo jì jö vigni ann de dui punć prozentuai ćina a arjunje le 48% por le tëmp de dorada mascima dl imprëst che é gnü fissé a 16 agn. "I criters nüs - dij Kompatscher - é gnüs elaborà debota y en acordanza cun i medemi benefiziars. L'obietif é chël da dè n impuls nü al turism sciöche motor de nosta economia".
USP
