Atualità
Operes stradales: L’entrada tla Val Badia é tla lista dles prioritês
USP - Danter l’ater à la Junta provinziala aprovè incö le program por la realisaziun dles operes publiches sön strada por i proscimi cinch agn: insciö él gnü inserì sön la lista cun la majera priorité l’entrada dla strada tla Val Badia dala strada statala a San Laurënz, che dess gnì scrita fora tl 2015.
L’assessur por i laûrs publics Christian Tommasini à porté dant incö do la sentada dla Junta provinziala l’aprovaziun dl program cuincuenal dles operes stradales, partides sö te de plü listes de prioritês. Tla pröma lista de operes che dess gnì scrites fora tl 2015, él gnü inserì la realisaziun dl’entrada dla strada tla Val Badia. “I savun che la popolaziun se damana la realisaziun dl’entrada por la Val Badia y porchël é le proiet inće gnü metü sön la lista dles prioritês por le 2015. I oressun mëte man cun i laûrs danter le 2015 y le 2016”, dij l’assessur Tommasini. Le diretur dla Repartiziun Laûrs publics Gustavo Mischì spliga i proscimi vari: “Proscimamënter gnaràl stlüt jö les espropriaziuns y implü val inće debojëgn da spostè la condüta dal gas por podëi daldô scrì fora i laûrs.”
Inće la realisaziun dla zirconvalaziun de Vahrn, i intervënć sön la strada che porta tl Sarenthein y sön la strada che porta a Salurn é gnüs detlarà prioritês dala Junta provinziala. Indöt él gnü metü söl program dles operes stradales 62 proieć por i proscimi cinch agn y che gnarà presentà dal assessur Tommasini te na conferënza stampa proscimamënter. “Por la realisaziun dles operes sön strada, mo inće por i cosć de manutenziun y por la segurëza dles strades él gnü aprovè por le 2014 92 miliuns de euro; por vigni ann che vëgn ćina le 2019 él preodü por le momënt na spëisa de 72 miliuns”, spliga Tommasini.
rc
