Atualità
Euregio:Rëi por les universitês y plata internet sön la pröma vera mondiala
USP - Na maiù colaboraziun, dantadöt tl ćiamp dl’archirida, danter les provinzies dl Tirol, Südtirol y Trentino: chësc é stè un di azënć dl’incuntada da inier, mertesc ai 17 de jügn a Desproch di trëi presidënć dles provinzies Günther Platter, Arno Kompatscher y Ugo Rossi adöm cun i returs dles universitês de Desproch, Balsan y Trënt.
Por stimulé i proieć tl ćiamp dl’archirida dles trëi provinzies dl Südtirol, Tirol y Trentin él gnü stabilì la fondaziun de n fonds de un n miliun de euro. La promoziun finanziara sarà insciö azessibla por dötes les istituziuns universitares tl raiun dla Euregio y le pröm concurs piarà bele ia tl 2014. Chësta dezijiun é gnüda tuta inier dai presidënć Platter, Kompatscher y Rossi adöm cun i returs Tilmann Märk, Walter Lorenz y Daria de Pretis.
Implü él inće gnü istituì n fonds por la mobilité di studënć y di professurs tres tl raiun dla Euregio por pormëte n barat interegional plü ampl ti ćiamps dl’archirida y dla sciënza. La partezipaziun ai programs de barat de studënć danter les universitês gnarà sovenzionada cun 100.000 euro. Insciö él poscibl tl dagnì por ejëmpl por professurs dla Universitè de Trënt da tignì n seminar a Desproch o por n studënt dla Universitè da Balsan da tó pert a na leziun a Trënt. “I ne adorun nia ma le potenziamënt dla mobilité sön les strades y scines tla Euregio, mo inće la cooperaziun culturala y scientifica ti ćiamps dl'université”, dij Günther Platter, presidënt dla Euregio.
Les concordanzes tla sciënza y tl’archirida dles provinzies é insciö inće na buna basa por amplié la colaboraziun, à splighé tratan l’incuntada le presidënt dla junta provinziala Arno Kompatscher. “L’acordanza dles definiziuns dles tematiches zentrales nes dà la poscibilité da orientè l’archirida te na direziun internazionala”, insciö Kompatscher. Inće por le presidënt dla provinzia de Trënt, Ugo Rossi, é le potenziamënt dla mobilité tla Euregio na poscibilité por n ampliamënt dla colaboraziun.
Implü él inće gnü presentè tratan la conferënza stampa di trëi presidënć a Desproch l’ediziun nöia dl liber „Tirol Südtirol Trentino. Ein historischer Überblick”. Le liber é gnü scrit dal storiograf Carlo Romeo en colaboraziun cun Giuseppe Ferrandi, Wilfried Beimrohr, Andrea Di Michele, Christine Roilo, Luigi Blanco y Brigitte Mazohl. La publicaziun nöia é gnüda ampliada cun i avenimënć atuai tla Euregio.
N ater proiet laorè fora en acordanza é la plata internet nöia sön la pröma vera mondiala, che é gnüda realisada aladô dl moto „Erleben-Entdecken-Verstehen“ („fà esperiënzes – scoprì – capì“) y che contëgn de plü material interatif. La plata internet sarà desponibla online sot ala misciun www.14-18.europaregion.info/ dal 1. de messè inant.
Do la conferënza stampa di trëi presidënć dles juntes provinziales Kompatscher, Platter y Rossi é l’incuntada spo jüda inant cun la pröma incuntada por i rapresentanć di media tl raiun dla Euregio.
rc
