Atualità
L’aziun „No Credit“ röia inće tles valades ladines
USP - Indoman, jöbia ai 19 de jügn, pëia ia la terza aziun dla campagna de sensibilisaziun por i motoziclisć sön les strades te döt le Südtirol: en jöbia (19 de jügn) sciöche en sabeda (22 de jügn) gnaràl partì fora inće sön i jus dles Dolomites flyers cun informaziuns sön i comportamënć sigüsc sön strada.
Por mirit dla buna colaboraziun cun la polizia comunala él bele gnü partì fora indöt 2000 flyers ai motoziclisć tratan les fins dl’edema dl’Assënza (ai 29 de mà – al 1 de jügn) y de Pasca de Mà (ai 7 de jügn – ai 9 de jügn). La campagna de sensibilisaziun “No Credit” à sciöche obietif chël da informè i motoziclisć le plü poscibl sön co rovëne sigüsc sön strada. La terza pert dl’aziun vëgn tignida chësta fin dl’edema, da en jöbia (ai 19 de jügn) ćina en domënia (ai 23 de jügn), inće deache al é preodü n aumënt dl trafich por gauja dles festivitês tles regiuns de vijinanza.
“Por evité inzidënć él important da se tignì tres ales normes stradales, da rovëne sigüsc y cun prudënza. Cun chësc laûr de sensibilisaziun orunse portè chësc messaje al majer numer poscibl de ciafêrs sön strada”, dij l’assessur por la mobilité Florian Mussner. Le laûr dla polizia é de chësc vers de gran valüta, insciö Mussner.
En jöbia (ai 19 de jügn) y en sabeda (ai 22 de jügn) gnarà l’aziun inće ampliada sön i jus dles Dolomites cun aziuns de destribuziun de flyers informatifs sön le Ju de Frara, le Ju de Sela y le Ju de Ćiaulunch, sciöche inće a Corvara, San Ćiascian y Sëlva. L’ultima aziun dla campagna de sensibilisaziun “No Credit” gnarà spo tignida tratan Santa Maria dai ciüf (ai 15 de agost).
rc
