Atualità
Fonds por i comuns: I comuns ladins de Belun fej vijita a Kompatscher
USP – Impormò l’edema passada à le presidënt dla Provinzia Arno Kompatscher stabilì la basa por na destribuziun nöia dl fonds por i comuns de confin; inier (ai 19 de jügn) à Kompatscher podü splighé a na delegaziun di comuns ladins de Fodom, Ampëz y Col i critêrs por l’assegnaziun di finanziamënć
I comuns ladins de Belun se fej gran speranzes por finanziamënć poscibli dal fonds por i comuns de confin che ti garantiss da portè inant proieć por le svilup economich. Le presidënt dla Provinzia Kompatscher à insciö splighé inier (ai 19 de jügn) a na delegaziun di comuns de Fodom, Ampëz y Cortina che i fonds gnarà aministrà tl dagnì a Balsan y a Trënt.
“I comuns de confin podarà dè jö sües propostes por proieć te n secretariat y spo saràl n comitê formè dai dui presidënć dles provinzies, dai presidënć dles regiuns interessades y da rapresentanć dl ministêr dles regiuns che tolarà les dezijiuns sön l’assegnaziun. I scioldi podarà ma gnì adorà sce trames döes les provinzies é a öna. La colaboraziun danter les döes provinzies sarà dessigü de gran vantaje por i comuns de confin, inće deache no le Südtirol no le Trentin metarà a desposiziun finanziamënć por propostes de comuns dalunc dai confins”, insciö le presidënt Kompatscher.
Tratan l’incuntada danter Kompatscher y la delegaziun de Belun él inće gnü tratè la chestiun dl raforzamënt dla mendranza ladina. Kompatscher à sotrissé che dötes les formes de colaboraziun suraregionala bele esistëntes dess gnì anuzades, sciöche al é inće bele sozedü por l’organisaziun dl festival dla jonëza dles cinch valades ladines tl 2013. Implü à le presidënt Kompatscher inće fat referimënt al govern talian a Roma, che à bele desmostrè tratan les tratatives cun le Südtirol y le Trentin che al tol söl scerio les ghiranzes dles mendranzes.
rc
