Atualità
Fonds por l’ambiënt: 838.000 euro de contribuć y stop por le dagnì
Usp - Indöt à la comisciun por i fonds por l’ambiënt aprovè da püch 838.000 euro por scomenciadies por l’ambiënt. Propostes y domandes nöies ne vëgn por le momënt nia plü tutes sö.
Dles indöt 33 domandes che é rovades ite nen à la comisciun por i fonds por l’ambiënt aratè positivamënter 24. La soma intiera dles sovenziuns aprovades é insciö de presciapüch 838.000 euro. Aprovà é insciö gnüs proieć por le mantegnimënt, la recostitiziun y la promoziun dla varieté dla natöra y dla contrada, sciöche inće por la promoziun dla proteziun dles sorts y dla lerch vitala. La comisciun provinziala à insciö aprovè finanziamënć por ći che reverda chisc proieć: la costruziun de n zënter d’informaziun sön la munt de Zander a Funes, la costruziun de n infopoint “Drei-Zinnen-Blick” por la gestiun dles staziuns dl parch natural a Tiers, Türesc y Naturns, na cualificaziun suplementara por i acompagnadus tl raiun dles “Dolomites – patrimone Unesco” y la costruziun de n percurs a temesc a Schenna.
Por le momënt ne vëgnel azetè plü degönes domandes. “I criters por la promoziun vëgn laurà fora danü valutan inće les mosöres de sparagn”, spliga l’assessur por l’ambiënt Richard Theiner che dij, che por diminuì les cutes por i zitadins él gnü stabilì da pert dla junta provinziala da sparagné danter l’ater inće tl setur dl ambiënt.
rc
