Atualità
L’assessuria provinziala Deeg sön le dé mondial dl sorvisc publich
Le dé internazional dl sorvisc publich él l’assessuria provinziala Waltraud Deeg che mostra l’importanza dl’aministraziun publica sciöche majera aziënda de sorvisc dla Provinzia. Por le dagnì s’aôdera n mudamënt dla perzeziun de chësc "partner dla zitadinaza".
Dan da 11 agn, dl 2003, à l‘UNO detlarè i 23 de jügn dé internazional dl sorvisc publich. "Dër na buna scomenciadia por reconësce l’ativité dl personal publich. Chësc laûr é dër important por la comunité, mo al vëgn dagnora laurè do les culisses", dij l’assessuria provinziala por le personal Waltraud Deeg.
An à sovënz na perzeziun deformada dl’aministraziun publica, che ne vëgn nia da inré liada a clischés negatifs y privilegs. "Sön chësc mëssunse laurè“, ghira l’assessuria provinziala. Che l’aministraziun publica é na gran aziënda y che ara é dër complessa a livel organisatif sostëgn l‘idea de na mascineria ria che n’é nia tlera. "La reorganisaziun preodüda portarà mioramënć", é l’assessuria provinziala Deeg sigüda.
Tl medemo tëmp ghirera inće na cosciënza dl’aministraziun nöia. "I sun partner y mediadus al sorvisc dla zitadinanza. Chësta noela mëssunse tignì amënt y agì y comuniché aladô", sotrissëia l’assessuria provinziala. Chësta é inće la condiziun por avëi inant porsones jones, creatives y ambizioses che laôra tl’aministraziun provinziala, insciö l’assessuria provinziala Deeg.
USP
