Atualità
Ass. Theiner: Le parch natural Scilier-Ćiadinac é particolarmënter da sconè
„L’anuzamënt dl teritore mëss ester en armonia cun la natöra”: chësc à dit da püch l’assessur por l’ambiënt Richard Theiner tratan süa vijita adöm ai rapresentanć di comuns y dles istituziuns interessades ala ćiasa dl parch natural Scilier-Ćiadinac a Tiers.
Le parch natural Scilier-Ćiadinac é le plü vedl de düć i set parcs naturai tl Südtirol cun n raiun d’espanjiun dl parch de 7.291 hectars. Le parch é partì sö danter i comuns de Ćiastel, Tiers, Fié y Suc. L’assessur Theiner s’à incuntè da püch tla ćiasa dl parch natural a Tiers cun i rapresentanć dl parch, di comuns, dl’agricoltöra y dl turism por se fà n impresciun dla situaziun atuala. Les perts interessades à detlarè da ester contëntes dl bel mantegnimënt di trus tl parch natural, sciöche inće dla colaboraziun danter l’Ofize parcs naturai y i colaboradus presënć sön le post.
I rapresentanć oress indere ti dè tl dagnì n atenziun particolara al’anuzamënt intensif de Mont Sëuc da pert dl turism y dl’agricoltöra. “Le parch natural fej pert dl raiun Natöra-2000 y dl patrimone UNESCO, n gran onur, mo chësc ô inće dì na gran responsabilité por ći che reverda la proteziun y le svilup persistënt dla regiun alpina”, à dit l’assessur Theiner che à inće damanè do propostes desfarëntes por localité por ći che reverda le sprinzé boacia. La Junta provinziala à te chësc vers da püch dè fora valgönes diretives por raiuns “Natöra-2000”. Inultima él inće gnü tratè de co podëi miorè la colaboraziun danter la ćiasa dl parch natural a Tiers, le stand de informaziun a Fié y la ćiasa nöia dl parch natural preodüda tl comun de Suc.
rc
Galaria dales fotografies
