Atualità
Morandini surantol l’inćiaria de aconsiad. por l’avalianza dles oportunitês
Michela Morandini é gnüda nominada a mez mà aconsiadëssa por l’avalianza dles oportunitês. L’assessuria por le laûr Martha Stocker y le diretur dl Departimënt Helmuth Sinn à incuntè Morandini inier, mertesc al 1. de messè, a Balsan.
L’inćiaria primara dl’aconsiadëssa por l’avalianza dles oportunitês é chëra da garantì n tratamënt valì dl’ëra y dl ël sön le post de laûr. L’aconsiadëssa é insciö la pröma porsona da contatè por porsones che vëgn descriminades diretamënter o indiretamënter sön le post de laûr por gaujia de so sès. L’inćiaria dl’aconsiadëssa n’é nia ma da dè jö arać y consëis ales porsones mo inće da realisé mosöres concretes por garantì le tratamënt valì danter les ëres y i ëi, sciöche por ejëmpl l’elaboraziun de raporć sön les condiziuns dl laûr te aziëndes y dites cun plü de cënt impiegać. L’aconsiadëssa por l’avalianza dles oportunitês fej inće pert de de plü comisciuns, por ejëmpl dla Comisciun Provinziala por le laûr y dl Consëi por l’avalianza dles oportunitês.
L’aconsiadëssa por l’avalianza dles oportunitês à süa sënta a Balsan, tl Departimënt dl Laûr, Palaz provinzial 12, Strada Kanonikus-Michael-Gamper. Ores de udiënza po inće gnì organisades a Porsenù, Bornech y Maran ( tel. 0471 418507 e-mail: gleichstellungsraetin@provinz.bz.it )
rc
