Atualità
Europa dles Regiuns: Le Presidënt Kompatscher à daurì le convëgn
Le dagnì dles regiuns tl'Uniun Europeica, les poscibilitês dl’Euregio, la funziun dl Südtirol y la pert desvalia dles istituziuns politiches regionales, statales y europeiches: Chëstes é stades les tematiches dl discurs dl Presidënt dla Provinzia Arno Kompatscher tratan la daurida dl convëgn europeich incö (4 de messè) a Ćiastel Prösels a Fié.
Danter incö, vëndres (04/07) y indoman, sabeda (05/07) gnaràl tignì de plü intervënć de autoritês politiches y dl monn dla sciënza y dl’archirida sön la tematica dl’Uniun Europeica y sön l’importanza dles regiuns tl contest dla legislaziun statala y europeica. Le Presidënt dla Junta Kompatscher à recordè tratan la daurida dl convëgn, che prësc avisa dan da 100 agn à la pröma vera mondiala metü man y chësc avenimënt à portè pro a n gröm de mudaziuns storiches. “Al é stè debojëgn de tratatives lungies ćina che al é stè poscibl da scomencè y da realisé n prozès de pêsc. Le Südtirol é incö n raiun fondamental, inće sciöche liam de coliamënt danter le nord y le süd”, insciö Kompatscher.
Le Presidënt dla Junta à recordè inant dötes les poscibilitês che é madorides por mirit dl’integraziun europeica: “Cun la colaboraziun danter raiuns che fej pert dl’Uniun Europeica unse por le pröm iade n stromënt por podëi realisé proieć sura i confins fora.” La colaboraziun suraregionala sarà inće öna dles chestiuns a chëres che an ti jarà do tratan i dui dis dl convëgn. Implü ti jarà i presënć do ala domanda sce l’Uniun Europeica y sü Stać mëmbri tol pordërt en conscideraziun sües regiuns y sce na revalorisaziun dles regiuns ne renforzass nia le proiet d’integraziun europeich.
Le convëgn „Regiuns tl'Europa – Europa dles Regiuns“ à metü man cun na pert scientifica organisada dala junta provinziala de Balsan adöm cun le Südtiroler Bildungszentrum. Tartan le convëgn portarà dant professurs dles universitês de Desproch, Trënt y Balsan y reladus da Bonn y Minca sües oservaziuns sön la relaziun dles regiuns cun i stać mëmbri y cun l’UE.
Indoman, sabeda ai 5 de messè gnaràl tignì la pert politica dl convëgn, en presënza di dui suranstanć dl govern Matteo Renzi y Werner Faymann.
rc
Galaria dales fotografies
