Atualità
Uniuns dl Sport: I contribuć é gnüs aprovà
Sciöche te vigni setur él inće preodü tl setur dl sport mosöres de sparagn, mo por podëi impò finanzié inant l’ativité y le funzionamënt dles uniuns dl sport él gnü aprovè inier (ai 7 de messè) dal Consëi provinzial por le sport na reorganisaziun di contribuć cun chëra che l’ativité dles uniuns podarà gni garantida.
L’assessuria provinziala Martha Stocker à recordè inier (ai 7 de messè) tratan l’incuntada cun le Consëi provinzial por le sport l’importanza dla promoziun dl sport y dla sanité: “Sambëgn ne é le setur dl sport nia sconè dales mosöres de sparagn, mo impò sunse stà bugn da ciafè le finanziamënt nezesciar por podëi garantì le funzionamënt dl’ativité dles uniuns dl sport”, insciö Stocker. Süa proposta por la destribuziun di contribuć por les Uniuns dl Sport é gnüda aprovada inier dal Consëi provinzial por le sport. “Insciö ne ti jarà le sostëgn finanziar nia ma ales gran uniuns y assoziaziuns, mo inće ales piceres che pratichëia sorts de sport nia tan conesciüdes”, insciö Stocker, che dij: “Chësc é nosc contribut por la promoziun dl sport che valorisëia l’impëgn dles tröpes porsones volontares tles organisaziuns de nosta provinzia.”
Les uniuns po se informè da śëgn inant pro l’Ofize por la promoziun dl sport y dla sanitè avisa sön la soma dl contribut: “Les uniuns gnarà informades por scrit, mo düć chi che ô s’informè plü avisa, po inće nes telefonè”, vëgnel informè da pert dl Ofize, olache an po cherdè sö al numer 0471 418340.
Tratan l’incunatda da inier él inće gnü baié dla tematica dl sport por porsones cun n handicap. “Le comitê por le sport paraolimpich nes à damanè da fà propostes sön co informè deplü la popolaziun sön les ofertes di grups de sport por porsones cun n handicap”, à splighé Stocker, che à dit: “Nosta ghiranza é chilò na maiù colaboraziun cun i sorvisc de reabilitaziun, sciöche pröm punt de contat cun i interessà.”
rc
Galaria dales fotografies
