Atualità
La Rëi Zivica vëgn organisada danü: i zitadins à la parora ćina ai 22/07
Trasparënta, saurida da lì y da capì: insciö é la Provinzia de Balsan che ô se presentè tl dagnì sön internet. Le prozès de reorganisaziun y de recostruziun dla Rëi Zivica à bele metü man y va inant tresfora: düć i utënć po fà para ćina en mertesc ai 22 de messè.
„Al basta 15 mënüć“, spliga l’assessuria Waltraud Deeg. 15 mënüć por dì la süa tres na scomeciadia online sön la plata web www.provincia.bz.it/temi y tó insciö automaticamënter pert ala reorganisaziun dl portal web nü dla Provinzia de Balsan. „I resultać – spliga Deeg – gnarà adorà por mëte adöm n conzet nü dla Rëi Zivica y integrè damì i bojëgns y i dejiders di zitadins ala verjiun atuala“. L’obietif é chël da scemplifiché la chirida online cun na reorganisaziun di seturs dl’organisaziun publica plü saurida da capì.
„Por fà para él ćiamò tëmp ćina ai 22 de messè: plü porsones che fej para plü che i sun bugn da miorè le sorvisc“, insciö l’assessuria Deeg. La partezipaziun di utënć vëgn registrada tres le „card sorting“: na metoda che tëgn cunt dles segnalaziuns di partezipanć tartan la costruziun dles plates web. La Provinzia de Balsan é öna dles prömes istituziuns che adotëia chësta metoda por miorè süa presënza sön internet.
„Nosta idea dla Rëi Zivica é chëra che ara dess ester trasparënta, saurida da lì y da capì, cun la poscibilité da podëi la adatè ales verjiuns desfarëntes de aparać eletronics“, insciö Deeg. Le proiet fej pert dl plann de svilup dl’Agenda Digitala 2020, aprovè da püch dala Junta, y che mira ala mioraziun dles tecnologies de comunicaziun y informaziun.
rc
