Atualità
Ressanamënt dla staziun de Pruca: Salf da aspetè stlüt por trëi dis
Da püch à metü man i laûrs de ressanamënt dl frabicat olache al é inće da ciafè la staziun dla ferata de Pruca. Por gaujia de intervënć interns ai locai, resta le salf da aspetè stlüt por trëi dis. Insciö ne saràl gnanca poscibl da avëi azes al automat dles chertes.
Do che le Comun à ciafè la conzesciun dala Provinzia por mëte man le ressanamënt dl frabicat che ospitëia la staziun dla ferata de Pruca à i laûrs metü man da püch. „Chësc é n ater vare inant por modernisé la staziun dla ferata y insciö le trasport local sön scines“, spliga l’assessur por la mobilité Florian Mussner. Le proiet prevëiga le ressanamënt dla pröma alzada dla staziun, dl salf da aspetè y di tloseć tla alzada a tera, sciöche inće la realisaziun de n bar. La spëisa preodüda é de indöt 500.000 euro y gnarà partida sö por 80 porcënt dala provinzia y 20 porcënt dal comun.
Por realisé le ressanamënt messarà le salf da aspetè gnì tignì stlüt da en mertesc, ai 22 de messè ćina en jöbia, ai 24 de messè. Te chësc tëmp ne saràl nia poscibl da fà les chertes por le iade diretamënter sön la staziun de Pruca. Le Departimënt Mobilité à lascè alsavëi chësta modaziun ai gesturs dla ligna. Al sarà indere poscibl tresfora da timbré les chertes ti sotpassaji dla staziun. En vëndres, ai 25 de messè sarà le salf indô azessibl.
rc
