Atualità
Cooperaziun al svilup: 40 proieć é gnüs aprovà
La consulta provinziala competënta à aprovè da püch le sostëgn por indöt 40 proieć por la cooperaziun al svilup de organisaziuns dl Südtirol sura döt le monn: tl’Africa, tl’America zentrala y dl süd, tl’Asia y tl’Europa dl ost. I seturs, olache la Provinzia de Balsan à confermè so sostëgn, é dandaldöt: l'agricoltöra, l'educaziun, l'ega, la sanité y la proteziun dles mendranzes.
La Provinzia de Balsan sostëgn vigni ann na seria de proieć de cooperaziun da pert de organisaziuns dl Südtirol te de plü perts dl monn. Les propostes che vëgn sovenzionades porta inant proieć ti seturs plü desvalis, sciöche por ejëmpl tl’agricoltöra sostenibla, tla costruziun de scores y de istituziuns por la sanité y por le refornimënt dl’ega, tla proteziun de mendranzes y por le svilup sozial.
Di 40 proieć valutà positivamënter n’él chësc ann indöt 22 che se crüzia de cooperaziun al svilup tl’Africa: cinch scomenciadies vëgn metüdes a jì tl Etiopia, trëi tl Benin, döes respetivamënter tla Republica Democratica dl Congo, tl Camerun, tla Tanzania y tl’Uganda y öna tl Burkina Faso, tl Mozambico, tl Niger y tl Sudan dl Sud. Indöt 12 proieć é gnüs aprovà tl continënt asiatich: trëi tl Nepal, dui tla Siria y un respetivamënter tl Tibet, tla Giordania, tla Camboja, tl Myanmar, tl Timor dl est, tla Tailandia y tl Vietnam. Implü vëgnel sostignì cater proieć de organisaziuns dl Südtirol tl America zentrala y dl süd (trëi tl Ecuador y un tla Guatemala) y dui indere tl'Europa dl ost (un tla Bosnia y un tla Moldavia).
La spëisa preodüda por le sostëgn de düć i 40 proieć é de prësc 1,8 miliuns de euro, por la provinzia él preodü investimënć de indöt 1,1 miliuns de euro. Por vigni proiet él insciö preodü na spëisa de 28.000 de euro sciöche valur mesan. L’import romagnënt é les organisaziuns che cöi adöm tres spënores, contribuć d’iscrić, contribuć d'atres organisaziuns y cun laûr volontar. Indöt él gnü valuté da n grup de laûr en colaboraziun cun les istituziuns competëntes 63 proieć, la consulta provinziala competënta à spo tut la dezijiun da sostignì economicamënter 40 proieć, tres tolon en conscideraziun les propostes fates dal grup de laûr.
rc
