Atualità
Le program por le svilup tl raiun rural é gnü dè jö a Bruxelles
Le mantignimënt dla competitivité y dla vitalité ti raiuns rurai tl Südtirol sciöche inće l’adoranza sostenibla dl teritore: Chisc, à sotligné l’assessur Schuler, é i fins dl program nü por le svilup tl raiun rural. Inier, mertesc ai 22 de messè, ti à l’Ofize Fonds strotorai UE tl’agricoltöra dè inant le program por i proscimi sis agn ala Comisciun Europeica.
Le sostëgn ai paurs jogn, les investiziuns te aziëndes agricoles, i paiamënć d’avaliaziun, les premies por n’agricoltöra biologica y por tiers manacià: „Chëstes é nostes propostes por le svilup tl raiun agricol ti proscimi agn y cun chëstes idees orunse se stravardè dala spopolaziun di raiuns rurai y promöie le mantignimënt dl’economia forestala te nüsc raiuns“, à splighé l’assessur por l’agricoltöra Arnold Schuler.
La Repartiziun Agricoltöra, à splighé le diretur de reparartiziun Martin Pazeller, à laurè fora na proposta por le program nü por la dorada di proscimi sis agn, dal 2014 ćina al 2020, en colaboraziun inće cun la Repartiziun Formaziun profescionala por l’agricoltöra, i bosć y l’economia de ćiasa, la Repartiziun Bosć, la Repartiziun Natöra, contrada y svilup dl teritore y l’Agenzia provinziala por l’ambiënt. Le program de svilup contëgn insciö mosöres de formaziun y consulënza por l’agricoltöra y l’economia forestala, sciöche inće mosöres de sostëgn por la competitivité dl’agricoltöra y por la mioraziun dl valur economich y sozial di bosć tl’economia forestala. Cun incö mët man ofizialmënter les tomades di terminns por l’aprovaziun di programs.
rc
