Atualità
Kompatscher ti fej vijita ai jogn al Euregio Summer Camp
Na vijita demorvëia à ciafè incö (mercui ai 23 de messè) i 60 jogn y mituns che é atualmënter al’Euregio Summer Camp tla Ćiasa dla Cultura a Neustift. Le Presidënt dla Provinzia, Arno Kompatscher, à vijité incö i jogn presënć al camp y à albü na discusciun cun vëi sön le tematiches plü desvalies dl’Euregio y dl Südtirol.
Le Euregio Summer Camp vëgn organisé bele por le secundo iade dal’Euregio Tirol-Trentin-Südtirol por i jogn y i mituns dai önesc ai catordesc agn. L’incuntada é gnüda organisada chësc ann tla Ćiasa dla Cultura a Neustift. Le fin dla scomenciadia é chël da portè adöm i jogn dles trëi provinzies por scoprì deboriada la storia y la richëza dles varietês culturales y linguistiches dl’Euregio. La vijita dl Presidënt dla Provinzia Arno Kompatscher é stada te chësc contest n avenimënt particolar y i jogn à insciö albü la poscibilité da ti fà al Presidënt les domandes plü desvalies, inće sön süa vita privata.
Valgönes domandes ti é gnüdes fates sön le tëmp te familia ("baldi dër püch tratan l'edema, deache le laûr é tröp, mo porchël é la domënia prenotada por la familia", ti à respognü le Presidënt), sön la profesciun ch'al ess orü fà ("Da pice orôi deventé astronaut o campiun dl monn dl jüch al palê. Dedô spo jornalist o avocat, mo i ne à mai ponsè da fà politica", à dit Kompatscher), sön süa vita da vigni dé sciöche Presidënt ("Vigni dé é atramënter, i lê alplü tert dales 5.30 y i ne röi mai a ćiasa dan les 23. I à n gröm d'incuntades a Balsan, mo inće a Vienna, Roma, Trënt y Desproch. I stüdi gran pert di documënć tratan i iadi cun l'auto, porchël adori inće n ciafêr. I mëti tres ma la firma dedô che i à lit i documënć.")
Tratan l'incuntada à le Presidënt inće respognü ales domandes sön l'idea dl'Euregio: "Iö pënsi che la colaboraziun suraregionala sides deventada na cossa naturala aldedaincö te n gröm de seturs, sciöche pro ejëmpl tla sanité, tl trasport publich local o tl'archirida", à dit Kompatscher, che à spo fat n apel ai jogn: "I speri che porvëis da afrontè la vita cun interès y coriosité. Fajede ći che ves fej ligrëza y n'avede degöna tëma da ves interessè de politica".
rc
Galaria dales fotografies
