Atualità
SS Gherdëina: a Laion streda davierta per l trafich dala 10.00
I ntervënc de slargiamënt dla streda statela te Gherdëina SS 242 tl chemun de Laion ie finei. Dala 10.00 da ncuei, vënderdì 25 de lugio, ie la streda inò davierta per l trafich y n possa furné lessù te tramedoi direzions.
Chësc ntervënt reprejentea l cumpletamënt de n prugram de ampliamënt de na trata dla streda statela de Gherdëina (SS 242) che fova particularmënter strënta danter l chilometer 2+985 y l chilometer 3+400.
Aldò dla spligazions dl geom. Stefano Maraner dl Ufize tecnich stredes zënter-sud dla Repartizion nfrastrutures dla Provinzia à i lëures de ampliamënt nteressà la trata danter l chilometer 3+230 y l chilometer 3+400 y chël mé sun la pert a val cun la frabica de n mur de sustëni de zement cun fundamënta sun micropei. La spëisa per la realisazion di lëures ie de ndut de zirca 650.000 euro.
I lëures ie unic fac dala firma Oberosler SF s.r.l. de Bulsan y ie unic finei scialdi dan l terminn udù danora, ajache n à stlut la streda defin ntan che l univa laurà.
Tla trata ndicheda fova la streda particulermënter strënta y periculëusa y n se à perchël cruzià de la slargë per la segurëza di veicui. Per chësc fin ie na pert dla vedla streda unida zareda ju defin y stluta al trafich dai 5 de mei 2014 per trëi enes y pona mo n iede per trëi enes pervia dl zedimënt de na pert dl raion de giaveda y dla streda dessëura per gaujes de natura geologica.
Pra i lëures da fé tucovel nce l asfaltamënt dla streda y la sistemazion di „guardrail“ cun chëi che n à pudù finé via chisc ultimi dis. Nsci àn pudù giaurì defin la streda ncuei, vënerdì 25 de lugio 2014, dala 10.00: la ie davierta y transitabla te tramedoi direzions.
La cuntlujion di lëures se à purtà pro scialdi dan i 150 dis prugramei ti cuntrac de ncëria, che udova danora la fin di lëures de setëmber.
USP
Galaria dales fotografies
