Atualità
Contribuć por i pendolars, domandes ćina ai 29 de agost
En vëndres ai 29 de agost toma le terminn por presentè les domandes por contribuć por les spëises de iade por le personal dependënt por l’ann 2013. Les domandes po gnì dades jö tla forma digitala tres la Rëi Zivica y l’Ofize Trasport de porsones. „Le passaje ales domandes online – dij l’assessur Florian Mussner – ti porta vantaji ai zitadins y al’aministraziun.“
Por le pröm iade gnaràl assegné i contribuć por les spëises de iade por le personal dependënt do criters nüs acordà danter i rapresentanć dl monn dl laûr y di consumadus. „Insciö vëgnel metü a desposiziun le budget finanziar da öna na pert por i pendolars che efetivamënter à da fà na trata lungia por rové söl post de laûr y dal’atra pert por düć chi che ne po nia s’anuzé di mesi dl trasport publich por rové söl post de laûr“, spliga l’assessur por la mobilité Florian Mussner. Dandaldöt vëgnel tut en conscidraziun i zitadins che laôra a turnus y che laôra tles zones dalunć dal zënter.
Por podëi fà domanda mëss le pendolar fà por almanco 120 dis al ann na trata lungia plü co 18 chilometri por jì sön le post de laûr. Sön la medema trata ne passèl degöna coriera o meso publich te n interval plü cört de mesora. Implü vëgnel tut en conscidraziun por l’assegnaziun dl contribut de plü criters por ći che reverda la lontanaza dal’architada plü daimprò, la concordanza danter i orars de laûr y dl trasport publich, i tëmps de aspeta. Al ne vëgn nia conzedü n contribut sce le davagn brutto anual dl proponënt superëia i 50 mile euro. Contribuć aprovà sot ai 200 euro ne vëgn nia paià fora.
Les domandes po ma gnì presentades online ćina en vëndres, ai 29 de agost cun na chërta di sorvisc ativa y cun le aparat de letöra (informaziuns al numer vërt 800 816 836 o tres www.provincia.bz.it/cartaservizi) o tres n account eGov zertifiché. Implü él ćiamò poscibl da dè jö na domanda ativan n account eGov nia zertifiché y se presentan daldô ti ofizi competënć por firmé la domanda y stabilì l’identité.
Dötes les informaziuns sön i contribuć por i pendolars é da ciafè sön la plata internet dla Rëi Zivica (http://www.provinzia.bz.it/la/), sot ala seziun „Sorvisc adorà le plü gonot“, tlichan chilò, o tl Ofize Trasport de porsones (0471 415492), pro i sindacać, i patronać y les comunitês comprensoriales.
rc
