Atualità
Ćiastel Tirol: Festa medievala ai 17 de agost
Vire n dé tl’eté medievala: Chësta esperiënza ti vëgn pitada por un n dé ai vijitadus dl Museum storich – cultural dla Provinzia de Ćiastel Tirol ai 17 de agost. Tratan la manifestaziun gnaràl insciö fat do scenes dla vita medievala sciöche combatimënć danter ćiavaliers y jori de falć. An podarà ascutè sö musiga medievala y ćiarćé rezëtes dl’eté danter l’antichité y la modernité.
La festa vëgn organisada en domënia, ai 17 de agost, dales 10 ćina les 18 tl Museum storich-cultural dla Provinzia de Ćiastel Tirol.
Te intervai regolars ti gnaràl portè dant ai vijitadus scenes dla vita medievala: al’entrada dl Ćiastel saràl fanć che farà la verda, n pêr de nobli se fajarà na spazirada danter la jënt, n cargà metarà a post i ćialza, n cogo y na fancela arjignarà ca na jopa por i fanć, n feur fujinarà n’armadöra, n ćiastelan dijarà sö a n scrivan n test por n documënt, monëdes gnarà stampades y libri arjignà ca. La sozieté „Gesellschaft der Elefanten“ presentarà combatimënć danter ćiavaliers te armadöres fates do ales originales. Implü gnaràl inće fat do scenes de jori cun falć tl zënter por falć dessot a Ćiastel Tirol. An podarà ascutè sö musiga dl’eté medievala y baroca portada dant dal ensemble „La Zag“ y ćiarćé rezëtes tipiches.
L’entrada ala festa y al museum é ai 17 de agost por döt le dé debann.
rc
Galaria dales fotografies
