Atualità
Pest avalianza dles oportunitês: Terminn ćina ai 02 de merz
Ćina ai 2 de merz dl 2015 saràl poscibl da presentè les teses de laurea, les teses de dotorat, de master y i laûrs d’inrescida che reverda la condiziuns dles ëres tla sozieté o l’ avalianza dles oportunitês danter ëra y ël por fà para al concurs por le pest scrit fora dala Comisciun provinziala por l’ avalianza dles oportunitês.
Le pest é gnü scrit fora por premié i studënć y les studëntes che se dà jö cun tematiches che reverda l’avalianza dles oportunitês o che taca adöm cun les condiziuns generales dl’ëra tla sozieté atuala dl Südtirol. I laûrs d’inrescida ne é insciö nia ma importanć deache ai motivëia la jonëza a se dè jö cun chëstes tematiches, mo ai po inće ester la basa por mudé concretamënter la sozieté tl vers de na maiù avalianza dles oportunitês danter i sesc.
Al po gnì dè jö teses de diploms y de laurea, teses de dotorat, laûrs d’inrescida y teses de master de almanco dui agn y inće sce ares é gnüdes scrites por inglesc (dailò mëssel inće gnì injunté na traduziun taliana o todëscia). Na comisciun valutëia spo danter l’ater l’analisa dla spezifizité feminina, la congruënza dla tematica cun chestiuns nöies y atuales, la valutaziun dl’auturia o dl autur y la dërta adoranza dl lingaz por ći che reverda trami dui i sesc.
I laûrs premià sarà a desposiziun dl publich tla biblioteca dla Comisciun por l’avalianza dles oportunitês por les Ëres tres le Sorvisc Ëra tla strada de via Dante 11 a Balsan.
Dötes les porsones interessades é periades da menè ite sües inrescides che reverda la condiziuns dles ëres tla sozieté o l’ avalianza dles oportunitês danter ëra y ël ćina ai 2 de merz dl 2015 al Ofize Ëres de via Dante 11 a Balsan. Por informaziuns plü monüdes, na descriziun di critêrs de valutaziun, la bandida de concurs y i formulars prëibel consultè la plata internet: http://www.provincia.bz.it/pariopportunita/.
rc
