Atualità

Economia | 24.02.2015 | 14:12

Dala Junta: sostëgn al’economia, 10 miliuns implü por le fonds de rotaziun

I imprësć a condiziuns avantajades tres le fonds de rotaziun é un di pilastri prinzipai dl sostëgn al’economia dla Junta provinziala. Do che la Provinzia à aumentè le fonds de rotaziun cun indöt 40 miliuns de euro, à la Junta aprovè incö (24 de forà) n’acordanza cun la Ćiamena dl Comerz che prevëiga n aumënt de ćiamò 10 miliuns laprò.

Tres l’arbassamënt dles cutes y n sistem de promoziun nü por l’economia ô le presidënt dla Provinzia Arno Kompatscher renforzè les impreses südtirolejes y ti dè na sbürla ala cresciüda di seturs economics dl Südtirol. I trëi pilastri dl sistem de renforzamënt reverda da öna na pert i contribuć a fond pordü por investimënć imateriai (consulënza, ajornamënt, export) y por mosöres straordinares te caji particolars, dal'atra bandides che prevëiga la conzesciun de promoziuns y en contlujiun la conzesciun de imprësć a condiziuns avantajades tres le fonds de rotaziun.

Les ressures desponibles dl fonds é tl mëis de forà dl 2015 de zirca 70 miliuns de euro, implü à la Junta provinziala preodü tl bilanz nü n’ajunta de 40 miliuns de euro da ti assegné ai seturs dl comerz, dl’agricoltöra, dl artejanat, dl turism y dl’industria. Tla sentada da incö (24 de forà) à la Junta provinziala aprovè implü n’acordanza cun la Ćiamena de Comerz por aumentè le fonds de rotaziun cun atri 10 miliuns de euro. Ćina la fin dl ann sarà insciö la soma totala di mesi finanziars metüs a desposiziun tl fonds de rotaziun, sce an mët laprò inće les somes de retüda che dess rové zoruch, de indöt 171 miliuns de euro.

"Chësta regolamentaziun nöia dl sostëgn al’economia ne é nia ma nezesciara – insciö le presidënt Kompatscher – por ti pormët ales imprejes n aumënt dl renforzamënt, mo inće deache i imprësć a condiziuns avantajades dal fonds de rotaziun é na manira de sostëgn permanënta dl sistem economich, n vantaje che ne vëgn nia garantì dala forma de sostëgn basada sön la spartida de contribuć." Por la fin de merz él preodü l’aprovaziun da pert dla Junta provinziala de critêrs d’azès nüs al fonds de rotaziun y da aurì inant gnaràl daurì le fonds por domandes do finanziamënć.

rc

Galaria dales fotografies