Atualità
Parch tecnologich, TIS y Fraunhofer: plü inovaziun por le Südtirol
Inovaziun y inrescida é stà danter i argomënć prinzipai dla sentada da incö (24/02) dla junta provinziala. L’esecutif cun a će Arno Kompatscher à aprovè les mudaziuns dl plann volumetrich dl Parch tecnologich y les convenziuns anuales cun le TIS y l'Istitut Fraunhofer.
Te püces edemes metarà man i laûrs por realisé le Parch tecnologich de Balsan Süd y la junta provinziala à aprovè incö (24 de forà) l’ajornamënt dl program planivolumetrich dla strotöra. La pert “publica” dl Parch, che portarà tl dagnì l'abreviaziun de NOI (Nature of Innovation), é gnüda ajornada, sön la basa di bojëgns porvia dla desposiziun de de plü laboratori y ofizi por i istituć de inrescida publics y privać, sciöche inće de na majera plaza da parchè sot tera ite.
Por chisc intervënć vëgnel metü a desposiziun 15 miliuns de euro, plü 900mile euro por realisé na strotöra d’assistënza por la pröma infanzia. Indöt é l’aumënt de cubatöra de 38mile metri cubics, n’ajunta che porta le total dla pert publica dl parch a 192mile metri cubics de volum. “Ara se trata a vigni moda de scioldi investis bun – à comentè le presidënt Arno Kompatscher – ajache cun le parch tecnologich fajarà le Südtirol de gran vari inant. Al sarà n post olache les aziëndes y i istituć de inrescida podarà cooperè y se ispiré un cun l’ater, portan pro a miorè la competitivité nia ma di singui mo de döt le raiun."
La junta provinziala à inće aprovè incö les convenziuns cun le TIS y l’istitut de inrescida Fraunhofer. Por ti pormët al TIS da finanzié sües ativitês preodüdes por le 2015 (che va dala difujiun dla conescënza al acompagnamënt da mëte sö na impresa, dala creaziun de rëis danter impreses y ënć de inrescida ala consulënza por le svilup de produć y prozesc) él gnü metü a desposiziun passa 5.700.000 euro. Por ći che reverda indere l’Istitut Fraunhofer, che à daurì n so zënter de inrescida a Balsan che colaborëia cun LUB, TIS, EURAC y Laimburg, reverda la convenziun na perioda de tëmp de trëi agn. La soma totala metüda a desposiziun dala Provinzia por le tëmp 2015-2018 é de 4.900.000 euro.
rc
