Atualità
Dala Junta: Plü segurëza por i implanć d’anuzamënt dles eghes publiches
N aumënt sostanzial y na maiù afidabilité di implanć d’anuzamënt dles eghes publiches gnarà garantis por merit dles desposiziuns de segurëza nöies aprovades incö ( 24 de forà) dala Junta provinziala.
Les desposiziuns de segurëza nöies vel por düć i implanć d’anuzamënt dles eghes publiches che à debojënn de na conzesciun, a pert i implanć por la produziun de energia idroeletrica por chi che al gnarà apliché regolamentaziuns aposta. La regolamentaziun nöia reverda insciö zirca 3mile di 13mile implanć d’anuzamënt dles eghes publiches che é indöt tl Südtirol, plü avisa 1900 implanć de irigaziun agricola y 1100 danter condütes dl’ega da bëre, morins, siëies, implanć d’inevamënt y por le zidlamënt de pësc y sistems por destodè i füć.
Les desposiziuns ne reverda indere nia pici implanć che adora manco de n liter de ega al secunt y 8mile poc adorà por gaujes desvalies. Chisc implanć ne messarà nia adatè les normes nöies inće deache al vëgn aratè che le potenzial de dann de chisc implanć é dër pice. Implü él gnü confermè le prinzip de basa do da chël che vigni conzescionar de implanć d’anuzamënt dles eghes publiches à la responsabilité plëna dla gestiun dl implant.
N’atenziun particolara reverdarà inće les condütes che passa por rogns y pares: „Na manutenziun y le control de chisc implanć é mosöres nezesciares dantadöt por la segurëza“, sotlignëia l’assessur provinzial Richard Theiner. La delibraziun dla Junta prevëiga controls periodics y la creaziun de n plann spezifich de manutenziun cun na dorada de 10 agn y che gnarà ajornè tresfora do na contlujiun de suralüsc y controi.
Por chi che ne respetass nia chëstes mudaziuns saràl preodü na amoniziun y daldô straufunghes danter 125 ćina 2.500 euro. „Cun l’aprovaziun dles desposiziun nöies gnarà l’afidabilité, la funzionalité y la segurëza di implanć aumentades“, insciö l’assessur Theiner. Tres na manutenziun sistematica y n eserzize regolamentè dessel inće gnì sotrissé l’importanza de na gestiun responsabla di implanć. Les normes nöies è gnüdes laurades fora en colaboraziun cun i ofizi dl’Agenzia dl ambiënt, dla Repartiziun Agricoltöra y dl’Avocatöra dla Provinzia. Implü él gnü tut en conscidraziun les osservaziuns da pert dla Lia di Paurs, öna de chëstes è stada chëra da atuè les normes nöies cun la mëndra burocrazia poscibla.
rc
