Atualità
Stocker: presentaziun dl stüde IPL sön le welfare tla Talia
Incö, mercui ai 25 de forà, él gnü presentè dal Istitut por la promoziun di lauranć (IPL) a Balsan n stüde sön i sistems desfarënć de welfare ti stać europeics en presënza dl presidënt dl Istitut Toni Serafini y dl’assessuria provinziala por le welfare Martha Stocker.
Le stüde sön le „Welfare state“, che é gnü fat dal Istitut por la promoziun di lauranć (IPL), analisëia la spëisa totala taliana en confrunt ai atri Paîsc europeics y indichëia valgün resultać de morvëia. Insciö dij le stüde che al ne é nia vëi che la Talia à na spëisa soziala alta, deache ara fej fora indöt le 29,9 porcënt dl PIL (7.017 euro por porsona al ann). En confrunt ala Talia spënn i atri 17 Paîsc europeics mesamënter 29,4 porcënt dl PIL por investimënć tl setur sozial (che fej fora mesamënter 6.907 euro por porsona al ann). Chësc resultat desmostra che la spëisa taliana arjunj söporjö n valur dër dlungia al valur mesan europeich. Ći che é dër desfarënt danter i Paîsc europeics é la spartiziun dles ressurses ti seturs desvalis dl ćiamp sozial.
N valur che le stüde confermëia é le cost alt dles ponsiuns tla Talia che fej fora le 15 porcënt dl PIL (le valur mesan europeich é de 11 porcënt). Nia tröp ne spënn la Talia mesamënter por les families: chilò é le valur mesan talian de 331 euro por porsona (1,3 porcënt dl PIL), en confrunt dl valur mesan europeich che é de 553 euro (2,3 porcënt dl PIL).
L’assessuria provinziala por les politiches soziales Martha Stocker à sotligné te süa analisa di resultać che „le confrunt di valurs nes pormët de valuté sce i sun sön la dërta strada cun nostes mosöres politiches tl setur sozial y sce nüsc investimënć tles infrastrotöres y ti sorvisc corespogn ales sfidades atuales. Al é important che i investimënć te chësc setur ne vëgnes nia ma odüs sciöche cosć, mo sciöche n investimënt por le dagnì por daidé les porsones y che à inće conseguënzes positives sön le svilup dl’economia.“
Por ći che reverda l’avalianza soziala dl welfare talian é süa posiziun al 23ejim post. Ti pröms posć él da ciafè i Paîsc dl’Europa dl Nord che garantësc na gran pert di sorvisc soziai universai zënza desfarenziè dales categories y che prevëiga por ejëmpl na spëisa por les families cinch iadi tan alta en confrunt dla Talia.
rc
