Atualità
Scores de musiga: Iscriziuns por l’ann de scora 2015/16 ćina ai 31/03
Ćina la fin de merz pon se scrì ite por l’ann 2015/16 dles scores de musiga y por les edemes da d’isté 2015. Les iscriziuns por les scores de musiga dla Val Badia y de Gherdëna mëss gnì dades jö tles döes direziuns cun sënta a La Ila y a Urtijëi.
Tratan döt le mëis de merz saràl poscibl da se scrì ite por l’ann de scora 2015/16 tles scores de musiga ladines y todësces de döt Südtirol. Les iscriziuns vëgn tutes sö separatamënter tles sëntes de vigni direziun dles scores de musiga tratan i orars dl secretariat ćina en mertesc, ai 31 de merz.
Te Gherdëna se fistidiëia dles iscriziuns ćina ai 31 de merz la direziun dla „Scola de Mujiga de Gherdëina“, cun i orars de ofize dal lönesc al vëndres dales 09.00 ales 11.30 y domisdé dales 15.00 ales 17.00. Informaziuns plü monüdes sön i cursc, les materies, les prenotaziuns por scolars nüs y les iscriziuns pon ciafè diretamënter dala Scora de Musiga de Gherdëna, (plaza San Durich 9, Urtijëi) telefon: 0471 796858, email: musikschule.stulrich@schule.suedtirol.it. Le flyer cun informaziuns sön les iscriziuns por le 2015/16 é gnü injuntè.
Tla Val Badia se crüzia dles iscriziuns por le 2015/16 la direziun dla scora de musiga dla Val Badia, cun süa sënta a La Ila. Le formular da compilé po gnì desćiariè dala plata internet tlican chilò. Le formular scrit forma y firmé dant y iadedô po gnì dè jö te ofize dla Scora de Musiga a La Ila, o menè por posta (Str. Ninz 9 – 39030 La Ila) o por fax al numer 0471 / 847748 o por e-mail musikschule.stern@schule.suedtirol.it. Formulars nia dà jö por tëmp ne vëgn nia tuć en conscidraziun. Le formular d’iscriziun y informaziuns sön le regolamënt por l’ann de scora 2015/16 é gnüdes injuntades.
Les iscriziuns por les edemes de mujiga da d’isté 2015 dl ćiamp scores de musiga todësces y ladines po inće gnì dades jö ćina ai 31 de merz dl 2015 tres la plata ofiziala online www.musikschule.it, olache an ciafa inće i formulars d’iscriziun y informaziuns generales sön dötes les direziuns dles scores de musiga ladines y todësces dl Südtirol.
rc
