Atualità
Ressurses dla Provinzia por i proieć dl FSE: Aprovaziun di critêrs
La Junta provinziala à tut incö (03/03) la dezijiun da sostignì les ativitês y i proieć finanzià dal Fonds sozial europeich cun n interès publich tler realisades aladô dles desposiziuns iuridiches y cun degügn aspeć critics. Do l’ejaminiaziun roada da Bruxelles s’âl cherié plü problems por l'amissibilité dl finanziamënt di proieć dal FSE.
Al ê öna dles tematiches plü debatüdes di ultims mëisc, śëgn à la Provinzia tut na dezijiun ofiziala por ciafè na soluziun che smendrësces i problems de finanziamënt dles organisaziuns y assoziaziuns che à ciafè finanziamënć y retüdes dal’Uniun Europeica por sü proieć. Le chestiun reverda le Fonds sozial europeich (FSE), dantadöt la perioda dl program danter le 2007 y le 2013: sön i 649 proieć ćiamò „daverć“ y bele finanzià, nen n’él n per che à n valgügn punć critics, tan inant che la Comisciun Europeica à metü n dübe te so raport final l’amissibilité dl finanziamënt di proieć. La conseguënza é stada l’architada de na ligna de finanziamënć, inće sce na gran pert dles ativitês é bele gnüdes stlütes jö dales assoziaziuns y cooperatives, inće deache al ê gnü dè la löm vërda da pert dl FSE.
„La lege omnibus sön l’economia che é gnüda aprovada le setëmber da denant – à sotligné le presidënt Kompatscher incö (03/03) – nes dà l’autorisaziun da finanzié cun les ressurses dl bilanz provinzial i proieć aprovà y documentà regolarmënter, che ne podarà nia gnì zertificà dala Comisciun europeica mo che desmostra n interés publich tler. Les tratatives danter la Provinzia y la Comisicun europeica va inant, mo por ne cherié nia ćiamò n’ajunta de dagns ales assoziaziuns y cooperatives, unse tut la dezijiun da anuzé chësta poscibilité che reverda sides le finanziamënt dles ativitês, che inće la retüda di paiamënć bele efetuà.“
Por podëi fà pert di caji preodüs dala normativa, che é stada incö, mertesc ai 3 de merz, le contignü dla deliberaziun aproada dala Junta provinziala, mëss i proieć ester stà al zënter de n provedimënt formal d’aproaziun da pert dl’aministraziun. Implü ne po les incoerënzes gnüdes a löm tla fasa de zertificaziun nia ester liades a colpes dl benefiziar dl proiet, mo le ideadù dl proiet mëss avëi orü realisé la scomenciadia cun buna orentè. Por ći che reverda indere le criter dl interés publich tler, se referësc la deliberaziun ai pröms dui articui dla lege provinziala sön l’ordinamënt dla formaziun profescionala, che prevëiga intervënć de pröm inserimënt, cualificaziun, re-cualificaziun, spezialisaziun y ajornamënt di lauranć.
La definiziun di singui proieć che gnarà aprovà por le finanziamënt da pert dla Provinzia gnarà stabilida caje por caje dales comisciuns competëntes dles repartiziuns o di departimënć de competënza. Inultima, tres por ći che reverda le FSE, àl metü man te chisc dis da laurè Claudio Spadon, che sarà le responsabl dl Ofize de gestiun dl Fonds sozial europeich, sides por la programaziun dal 2007 al 2013 che por la programaziun nöia ćina le 2020.
rc
