Desvalì | 03.03.2015 | 14:49

Dala Junta: Heiner Schweigkofler sarà le proscim presidënt dl IPES

La Junta provinziala à fat fora incö (3 de merz) l’inom dl presidënt dl IPES nü: al sarà Heiner Schweigkofler, diretur dla Caritas ti ultims 13 agn che surantolarà l’inćiaria de Konrad Pfitscher. „Al é na porsona cun capazitês da manager y cun tröpa esperiënza tles politiches soziales“, insciö le presidënt Kompatscher y l’assessur Tommasini.

Sön proposta dl assessur por le frabiché abitatif Christian Tommasini à la Junta provinziala nominé incö, mertesc ai 3 de merz, Heiner Schweigkofler sciöche presidënt dl IPES do Konrad Pfitscher, che é gnü lité sciöche ombolt de St. Leonhard de Passeier l’ ann passè de novëmber. „Cun Heiner Schweigkofler unse ciafè la dërta porsona por l’inćiaria de presidënt, al à tröpes cualitês da manager y competënzes soziales reconesciüdes. Cun chëstes premisses àl les mius condiziuns por respogne te na manira efiziënta ales sfidades dl dagnì che reverdarà l’Istitut dl frabiché abitatif sozial“, à sotligné le presidënt dla Provinzia Arno Kompatscher tratan la conferënza stampa do la sentada dla Junta. „La nominaziun de Schweigkofler é n segnal important – insciö l’assessur competënt Tommasini – deache i ùn ciafè n espert de politiches soziales y n manager cun dër de bunes capazitês.“

Heiner Schweigkofler é atualmënter diretur dla Caritas dla Diozeja, al à studié filosofia y pedagogia, tratan so percurs de formaziuns àl inće stlüt jö n master de management sozial y na formaziun de mediadù. Tratan so laûr de plü agn por la Caritas y la Fondaziun Sant’Elisabeth âl svilupé na seria de competënzes dër ampla, cun tröpes esperiënzes tl setur sozial, inće por ći che reverda la nezescité de avëi na ćiasa o n post da afité por le svilup dl singul y dla sozieté.

„Cun la nominaziun de Schweigkofler sciöche presidënt IPES orunse renforzè les competënzes soziales dl IPES, chësc sarà poscibl dantadöt por mirit dla colaboraziun  y esperiënza de plü agn dl presidënt nü tl setur sozial“, insciö Kompatscher. L’assessur Christian Tommasini à rengrazié le presidënt atual Konrad Pfitscher, „cun chël che al é stè poscibl da arjunje ti ultims cater agn obietifs importanć, inće por ći che reverda le ressanamënt di cuartiers.“ Cun la nominaziun dl presidënt IPES nü (ti proscims mëisc gnaràl inće chirì fora tres n concurs publich le diretur nü) val inant le percurs de reforma dl istitut da pert dla Junta. L’IPES aministrëia atualmënter n patrimone de 13.500 cuartiers y pîta insciö respostes ales esigënzes soziales di zitadins. Insciö se fistidiëia l’Istitut danter l’ater dl’aministraziun di caurtiers abitatifs, dles assegnaziuns y dles domandes, dl’assistënza ai afitdadins y ales afitdadines.

Inultima él gnü confermè le Consëi d’aministarziun atual cun le vizepresidënt Renzo Caramaschi y la comëmbra Manuela Paulmichl.

rc