Atualità
Privacy: L’assessuria Stocker à fat la proposta dl‘azetaziun„implizita“
L’assessuria por la sanité Martha Stocker à portè dant ala sentada dla comiscun dla sanité incö (04.03) a Roma la problematica dl gran laûr burocratich pro la domanda de consëns por l’adoranza dla documentaziun eletronica di paziënć. N grup de laûr sot la direziun de Stocker laurararà śëgn fora na proposta nöia, che prevëiga l’azetaziun „implizita“ di paziënć.
En colaboraziun cun les assessuries por la Sanité dl Friuli Venezia Giulia Maria Sandra Telesca y dl Trentin Donata Borgonovo Re à l’assessuria Martha Stocker portè dant incö, mercui ai 4 de merz, tratan la sentada dla comisciun dla sanité la problematica dl tratamënt y dl’aministraziun di dać tlinics di paziënć. „La nezescité da mëssei avëi l’aprovaziun por la privacy por la realisaziun y elaboraziun dla documentaziun di paziënć nes à portè sciöche conseguënza n aumënt sostanzial dla burocrazia por i paziënć y l’aministraziun“, insciö Stocker.
Tratan la sentda dla comisciun por la sanité él insciö gnü tut la dezijiun, che n grup de laûr sot la direziun dl Südtirol, dl Trentin y dl Friuli Venezia Giulia dess laurè fora na proposta por la regolamentaziun dla privacy por la Conferënza dles Regiuns. „Nosc obietif é chël da arjunj l’azetaziun „implizita“ da pert dl paziënt te cört tëmp“, sotlignëia Stocker. Chësta proposta prevëiga che le paziënt messass detlarè tleramënter che al ne ô nia che le personal dla sanité ais azés a sü dać tlinics. „Ne fêjel chësc nia ess ma le personal che à en cura le paziënt automaticamënter le dërt da avëi azès a sü dać“, insciö Stocker. Tratan l’incuntada s’à inće i atri mëmbri dla comisciun mostrè a öna cun chësta proposta, che alisirass cotan le laûr de düć i interessà inće tles atres regiuns.
rc
