Atualità
Practicums da d’isté: 400 domandes por 200 posć, respostes ala fin de merz
Al é indöt 400 studënć y studëntes dl Universitês y dles scores altes che à presentè na domanda por un di 200 posć a desposiziun por practicums da d’isté. „L’Ofize Assunziuns Personal – sotlignëia l’assessuria Waltraud Deeg – é tl valuté dötes les domandes, y ćina la fin dl mëis de merz saràl düć che ciafarà na resposta por email.“
Les domandes rovades ite por n practicum da d’isté tl’aministraziun publica é avisa de 391, 129 studënć dles scores altes y 262 che frecuentëia n’Université. „Le terminn por la presentaziun dles domandes – spliga l’assessuria Deeg – é scadü ala fin de jenà, n mëis dan la tomada normala dl terminn. Chësta dezijiun é gnüda tuta por ti dè la poscibilité ai scolars y ales scolares da podëi planifiché l’isté te na manira plü scëmpla.“ Inće por chësta gaujia é le numer dles candidatöres tomè da 600 a 400, „mo al é impò le dopl dl numer de posć che i podun mët a desposiziun“, insciö Deeg che ajuntëia che „al é nosta intenziun da amplié le numer di posć a desposiziun tl dagnì. I ùn bele ciafè te chësc vers n’acordanza cun i sindacać y la proposta é gnüda inserida tla proposta de lege sön l’ordinamënt dl personal.“
Intratan é l’Ofize Assunziuns personal gnü inćiarié da fà na gradatöra por assegné i practicums da d'isté dl 2015. „Por la fin dl mëis de merz saràl düć chi che à fat domanda che ciafarà na resposta scrita por email“, insciö le diretur dl ofize Maurizio Pacchiani. La gradatöra vëgn metüda adöm sön la basa de na seria de critêrs che reverda le titul dl stüde mo inće l’esperiënza de practicums da d’isté, olache chi che ne à nia ćiamò fat n practicum pro l’aministraziun publica à n vantaje. Le paiamënt brutto preodü por i practicanć é dai 30 ai 50 euro al dé.
rc
