Atualità
Dala Junta: Regolamënt nü söi jori te raiuns sot a sconanza
La Junta provinziala à aprovè incö (10 de merz) na regolamentaziun nöia che reverda i jori de elicoteri te raiuns sot a sconanza. „Tres la definiziun tlera dla sort di jori, di trus de passaje aposta y de posć d’ateraje orunse smendrì le plü che ara va les conseguënzes di jori por l’ambiënt tles zones plü sensibles“, insciö l’assessur por la mobilité Florian Mussner.
L’incuntada dla Junta provinziala à incö, mertesc ai 10 de merz, metü man bele abonora dales 07.30, deache al é sön le program na sentada de prescia dl Consëi regional a Trënt. Danter l’ater él insciö gnü aprovè n regolamënt nü cun na definiziun tlera dla sort di jori, di trus de zircolaziun di joliers ti raiuns sot a sconanza y di posć d’ateraje ti raiuns da munt sura i 1600 metri.
Insciö podaràl gnì efetuè tl dagnì jori che é de interés publich, sciöche por ejëmpl por rajiuns de sciënza, d’inrescides, de stüde y de protocol (sce le jolier é indispensabl), por le trasport de porsones por suralüsc, por registraziuns dal alt (pro manifestaziuns plü granes o pro trascmisciuns culturales), por la formaziun di piloć, por registraziuns televisives y por le sorvisc de renfornimënt dles üties da munt.
Por ći che reverda i posć d’ateraje ti raiuns sot a sconanza ti raiuns da munt sura i 1600 metri, él proibì da mët sö posć d’ateraje tles vijinanzes de parcs naturai, de raiuns de sconanza Natura 2000, de biotops y de üties da munt. La definiziun di posć d’ateraje vëgn regolamentada dala Junta provinziala do n arat obliënt dai Comuns y l’autorisaziun dla ENAC (ënt nazional por l’aviaziun zivila). La Junta provinziala à insciö stabilì i cater posć d’ateraje por joliers sura i 1600 metri sön le Jù de Frara, tla Val Aurina sön Speikboden, sön Plan de Corones y ite Kurzras-Schnals.
La Junta provinziala à stabilì implü i trus de zircolaziun di jore che é da ciafè sön Jù de Sela, Jù de Ćiaulunch,Val Badia/San Ćiascian, Resia, Val Senales, Val Marano/Proves /Lauregno, Jù dles Palade, Jù dl Rombo y Alta Val d’Isarch/Val de Vizze. I jori mëss adorè la trata plü cörta, doré le manco poscibl y avëi les conseguënzes plü piceres poscibles por l’ambiënt.
Proibì resta dötaurela – sciöche inće preodü dala lege provinziala nr. 15 dl 27.10.1997 – le heliskiing. Dess n’aziënda de joliers ne se tignì nia a chësta regolamentaziun nöia él preodü straufunges che va dai 2000 ai 4000 euro. Les violaziuns eventuales gnarà registrades dal’autorité forestala competënta. „Sce al vëgn jorè sura n parch natural mëssel inće gnì fat na comunicaziun ala Repartiziun Natöra, Ambiënt y Svilup dl teritore“, stlüj jö l’assessur.
rc
