Atualità
Dala Junta: 20,5 miliuns por la manutenziun dles strades
Söporjö 20,5 miliuns de euro é preodüs por laûrs de manutenziun straordinara dles strades statales y provinziales dl Südtirol. La deliberaziun y le program por l’ann 2015 é gnüs aprovà incö (10 de merz) dala Junta provinziala sön proposta dl’assessur Mussner. Al se trata indöt de 2.659 chilometri de rëi stradala, de 206 tunnels y de 1.662 punć.
La pröma tematica tratada incö (10 de merz) dala Junta provinziala te süa sentada tl Palaz Widmann é stada le program dl 2015 che reverda i intervënć de manutenziun straordinara dles strades de competënza dla Provinzia. „Nosc obietif é chël – à recordè l’assessur competënt Florian Mussner – da ti garantì ai zitadins coliamënć sigüsc y moderns, y insciö sunse oblià da investì ann por ann somes altes por la manutenziun y le mioramënt dla rëi stradala dl Südtirol.“ I laûrs reverda danter l’ater le control costant dles condiziuns dles strades, la costruziun de barieres de proteziun, la stabilisaziun di parëis y dles rogns, laûrs de prescia por dagns dl maltëmp y dl’adoranza de plü agn dles strades.
Inće por ći che reverda le 2015 é la maiù pert di finanziamënć (8,2 miliuns de euro, le 43 porcënt dl program) che vëgn investì por intervënć de asfaltè. Por mürs y barieres de proteziun él indere preodü na spëisa che fej fora le 17 porcënt dl budget anual cun n investimënt de 3,34 miliuns de euro. Les atres spëises plü importantes dl program 2015 reverda la metüda en segurëza di parëis y rogns (2,2 miliuns de euro, 13 porcënt dl total) y laûrs de amodernamënt y de manutenziun di punć (1,6 miliuns de euro, zirca le 9 porcënt dl total). „Implü él inće preodü intervënć ti tunì por na soma de 650mile euro, cun i intervënć prinzipai preodüs tles galeries dla Val Badia, de Porsenù, de Bornech, a Rodeneck y a Naturns.“
Pro le program aprovè incö âldel inće laprò i 170mile euro por le mioramënt dla segnaletica stradala, „n aspet che gonot ne ćiafa nia l’atenziun che al se miritass pordërt, deache ara é fondamentala por la segurëza, dantadöt dlungia les strisciores pedonales, i coliamënć incrujà y les incrujades“, recorda l’assessur Mussner che sotlignëia inće l’importanza che le program dla manutenziun straordinara dles strades à por l’economia locala, „che porta pro, tl respet dles leges che regolamentëia te chësc setur, a na seria de inćiaries por de piceres aziëndes dl Südtirol. Tl 2014 é prësc düć i laûrs gnüs assegnà a imprejes locales, y i sun sigü che an podarà garantì le medemo inće por chësc ann.“
rc
